AzərbaycanРусскийEnglish
15 dekabr 2016-cı il tarixində Sumqayıt Dövlət Universitetində Azərbaycan Respublikasının dövlət müstəqilliyinin bərpasının 25-ci il dönümünə həsr olunan "Riyaziyyatın tətbiqi məsələləri və Yeni İnformasiya Texnologiyaları” mövzusunda III Respublika Elmi konfransı başlamışdır. Konfrans Azərbaycan Respublikasının Təhsil Nazirliyi, Sumqayıt Dövlət Universiteti, Azərbaycan Milli Elmlər Akademiyası və İnformasiya Texnologiyaları İnstitutunun təşkilatçılığı ilə keçirilir.
1 dekabr 2016-cı il tarixində İdarəetmə Sistemləri İnstitutunda 01.12.2016-31.05.2017-ci il tarixləri arasında təcrübə keçəcək "SABAH” qruplarında təhsil alan tələbələrlə görüş keçirilmişdir. Görüşü institutun direktoru, akademik Telman Əliyev açaraq, tələbələrə Azərbaycanda İKT elminin keçdiyi inkişaf yolundan bəhs etdi və onlara uğurlar arzuladı. Sonra tələbələr təcrübə keçəcəkləri laboratoriyalar və rəhbərlər ilə tanış oldular.
01 dekabr 2016-cı ildə AMEA İdarəetmə Sistemləri İnstitutunda Əmiraslonova Zərbaf Nüsrət qızının r.ü.f.d., dosent Ə.Paşayevın rəhbərli ilə 1203.01 – "Kompyuter elmləri” ixtisası üzrə texnika üzrə fəlsəfə doktoru elmi dərəcəsi almaq üçün "Dəmir-beton konstruksiyalarında metal sərfinin optimallaşdırılması” mövzusunda təqdim olunmuş dissertasiya işinin müzakirəsi keçirildi.
Koqnitiv modelləşdirmə (http://rabitadunyasi.info.az) – mürəkkəb sistemlərin və mürəkkəb problemli situasiyaların model eksperimenti və idarə edilməsi üçün geniş imkanlar açan yeni intellektual multidistiplinar texnoloji platformadır.

İdarəetmə Sistemləri İnstitutunun laboratoriya rəhbəri Qarayev Robert Əsədulla oğlunun "Turkish Journal of Fisheries and Aquatic Sciences”, (Thomson Reuters, Science Citation Index, SCI Expanded, Scopus), "Journal of Fisheries and Aquatic Science” (Science Citation Index, Scopus), "Global Journal of Advanced Research” jurnallarında çap olunan "Methodology to Develop a Recovery Strategy for the Sturgeon Stocks of the Caspian Sea” məqaləsində Xəzərin nərə balığı populyasiyalarının bərpası strategiyasının koqnitiv modelləşdirmə metodologiyası təklif olunmuşdur.
Rabitə və Yüksək Texnologiyalar Nazirliyinin təşkilatçılığı, "Huawei” şirkətinin sponsorluğu ilə 29-30 noyabr tarixlərində "Bakutel-2016” Beynəlxalq telekommunikasiya və informasiya texnologiyaları sərgisi çərçivəsində "Hilton"otelində "Əşyaların İnterneti. Növbəti nəsil” mövzusunda konfrans keçirilmişdir.
Konfransda "Huawei”, "SAP” və "Cisco” kimi qlobal informasiya texnologiyaları şirkətlərinin, eləcə də yüksək texnologiyalar sahəsi üzrə bir sıra beynəlxalq təşkilatların, konsaltinq qurumlarının, mikrosxem/modul/avadanlıq təchizatçılarının və mobil operatorların  nümayəndələri iştirak etmişdir.
Tədbir çərçivəsində "İKT strategiyası və "Əşyaların İnterneti”nə dair Planlar”, "Əşyaların İnterneti” Mühiti və Marketinq Təhlili” ilə bağlı yeni biznes imkanları kimi mövzular müzakirə olunmuşdur. Konfransda, həmçinin mobil operatorlar tərəfindən idarəetmənin təkmilləşdirilməsi, rəqəmsallaşdırma və biznes inkişaf strategiyaları müzakirə olundu.
Konfrasda AMEA İSİ "Xarici əlaqələr və innovasiya" şöbəsinin rəhbəri, t.ü.f.d. T.Babayev,  elmi işçilər A.Əliyeva və S.Babayeva da iştirak etmişdirlər.
Azərbaycan Milli Elmlər Akademiyası Azərbaycan Respublikası Nazirlər Kabinetinin 18 noyabr 2016-cı il tarixli, 601s nömrəli sərəncamı ilə təsdiq olunmuş Plana əsasən 2016/2017-ci tədris ili üçün fəlsəfə doktoru və elmlər doktoru hazırlığı üzrə doktoranturaya və dissertanturaya qəbul elan edir.

Fəlsəfə doktoru və elmlər doktoru hazırlığı üzrə doktoranturaya və dissertanturaya sənədlər 2016-cı il noyabrın 28-dən dekabrın 16-dək hər gün (şənbə və bazar günləri istisna olmaqla) saat 10:00-dan 17:00-dək qəbul ediləcək.

Fəlsəfə doktoru proqramı üzrə doktoranturaya ali təhsili olan (ali təhsil pilləsinin magistratura səviyyəsini bitirən, yaxud təhsili ona bərabər tutulan, tibbi təhsildə isə həkim və həkim-mütəxəssis) Azərbaycan Respublikasının vətəndaşları müsabiqə yolu ilə qəbul olunurlar.
21-25 noyabr 2016-cı il tarixlərində Avstriyanın Linz şəhərində Avstriya Eləmlər Akademiyasının Yohan Radon adına Hesablama və Tətbiqi Riyaziyyat İnstitutu tərəfindən təşkil olunan "Elmdə və mühəndislikdə hesablama üsulları” adlı xüsusi semestr çərçivəsində "Optimal idarəetmə və əlaqəli sahələrdə Hamilton-Yakobi tənlikləri üçün ədədi üsullar” mövzusunda Beynəlxalq konfrans keçirilib ("Numerical methods for Hamilton-Jacobi equations in optimal control and related fields”). Beynəlxalq konfransda AMEA İdarəetmə Sistemləri İnstitutunun aparıcı elmi işçisi, riyaziyyat üzrə fəlsəfə doktoru, dosent Rəhimov Anar iştirak edib.
18 noyabr 2016-cı ildə AMEA İdarəetmə Sistemləri İnstitutunun D 01.121 Dissertasiya Şurasının iclası keçirilmişdir. İclasda  t.e.d., dosent R.R. Rzayevın rəhbərliyi ilə Göyüşov Aydın İslam oğlunun texnika üzrə fəlsəfə doktoru alimlik dərəcəsi almaq üçün 1203.01 – "Kompüter elmləri" ixtisası üzrə yerinə yetirdiyi "Rabitə xidmətlərinin keyfiyyətini qiymətləndirən neyro-fuzzy modellərin və alqoritmlərin işlənilməsi" mövzusu üzrə dissertasiya işinin müdafiəsi keçirilmişdir.