Akademik Asəf Hacıyev beynəlxalq konfransa plenar məruzəçi kimi dəvət olunub

22.02.2021 / Конференции, собрания

2021-ci ilin 1-4 avqust tarixlərində İspaniyanın Toledo şəhərində keçiriləcəyi nəzərdə tutulmuş XV-ci «İdarəetmə Elmi və Mühəndislik İdarəetməsi» («Management Science and Engineering Management») beynəlxalq konfransa AMEA İdarəetmə Sistemləri İnstitutunun şöbə rəhbəri, akademik Asəf Haciyev plenar məruzəçi kimi dəvət olunub.

Beynəlxalq konfransın electron səhifəsində (http://www.icmsem.org/news-5.html) A.Hacıyev haqqında yazılır:

“Beynəlxalq səviyyədə tanınmış alim akademik A.Hacıyev M.V. Lomonosov Moskva Dövlət Universitetinin məşhur Kolmogorov ehtimal məktəbinin məzunu olmuş və orada tələbədən professora gedən bir yol keçmişdir. Hal hazırda dünyanın aparıcı jurnallarında nəşr olunan 130-dan çox məqaləsi vardır. A.Hacıyev mürəkkəb quruluşlu xidmər sistemləri üçün xidmətin başlanğıc gecikmələrini tətbiq etməklə xidmətin səviyyəsinin artmasına imkan yaradan idarəetmə nəzəriyyəsi yaratmışdır. Bundan başqa, tətbiqlərə xas olan naməlum parametrlərinin sayı artan yeni bir regresiya modeli qurmuşdur. Həmçinin, Azərbaycan Standartlaşdırma, Metrologiya və Patent üzrə Dövlət Agentliyi tərəfindən dövlət standartı kimi qəbul edilmiş və hal hazırda Windows 8.1 və sonrakı versiyalarında istifadə olunan Azərbaycan əlifbasının hərflərinin kompüter klaviaturasında optimal şəkildə yerləşdirilməsi üçün yeni bir metod yaratmışdır. O, eyni zamanda Azərbaycan dilində "Ehtimal nəzəriyyəsi və riyazi statistika ensiklopediyası" nın müəllifidir”.

Qeyd edək ki, bu konfransın əsərləri Şpringer nəşriyyatında çap olunur və akademik Asəf  Haciyev konfransın əsərlərinin redaktorlarından biridir.