TÜBİTAK-ın Marmara Araşdırma Mərkəzinin əməkdaşları ilə görüş keçirilib
12.09.2022 /
AMEA-nın Rəyasət Heyəti aparatının Beynəlxalq elmi əməkdaşlıq şöbəsi və Türkiyə Elmi və Texnoloji Tədqiqat Şurasının (TÜBİTAK) təşkilatçılığı ilə TÜBİTAK-ın Marmara Araşdırma Mərkəzinin (MAM) əməkdaşları ilə Azərbaycandan olan həmkarları arasında onlayn görüş keçirilib.
Tədbirdə MAM-ın İqlim dəyişkınliyi və davamlılıq üzrə vitse-prezidentliyinin Yer Elmləri Tədqiqat qrupunun rəhbəri Dr. Erhan İlkmenin rəhbərlik etdiyi nümayəndə heyəti, Azərbaycan Respublikası Elm və Təhsil Nazirliyinin Neft və Qaz İnstitutunun direktoru, akademik Fəxrəddin Qədirov və Geologiya və Geofizika İnstitutunun müvafiq şöbələrinin alimləri, AMEA-nın Rəyasət Heyəti aparatının Elmi-təşkilat idarəsinin rəisi, dosent Rüstəm Rüstəmov və Beynəlxalq elmi əməkdaşlıq şöbəsinin əməkdaşları iştirak ediblər.
Görüş zamanı cari ilin may ayında “TEKNOFEST Azərbaycan” Aviasiya, Kosmos və Texnologiya festivalı çərçivəsində ölkəmizdə səfərdə olan TÜBİTAK-ın vitse-prezidenti, MAM-ın prezidenti, professor Əhməd Yozgatlıgillə AMEA-da keçirilən görüş zamanı başlanmış müzakirələrin davamı olaraq ətraflı fikir mübadiləsi aparılıb. Tərəflər arasında təbii fəlakətlər, geoloji təhlükələr, ərazinin təsnifat tədqiqatları, paleysmoloji və arxeoloji nümumələrin tədqiqi və s. mövzularda müzakirələr aparılıb və müştərək tədqiqatlar üzrə istiqamətlər müəyyənləşdirilib.
Sonda MAM nümayəndələri tərəfindən AMEA-nın təklif etdiyi müştərək mükəmməllik mərkəzlərinin yaradılmasının mümkünlüyü ifadə olunub.
