Maraqlı statistika: Yer kürəsi əhalisinin 40%-i heç zaman internetdən istifadə etməyib
24.10.2022 /
Şəbəkə Operatorları Assosiasiyası olan GSMA-nın aparmış olduğu son tədqiqata əsasən mobil şəbəkə Yer kürəsi əhalisinin yalnız 95%-i üçün əlçatandır. Lakin bununla belə Yer kürəsi əhaləsinin 40%-i heç zaman internetdən istifadə etməyib və bu səbəbdən həmin insanlar vacib məlumatlardan və digər imkanlardan məhrumdurlar. GSMA isə öz növbəsində bu məsələ ilə bağlı daha dəqiq statistikanı təqdim edib və insanlar üçün interneti necə əlçatan etməyin lazım olduğunu açıqlayıb. GSMA analitiklərinin sözlərinə əsasən 3.2 milyard insan və ya başqa sözlə desək Yer kürəsi əhaləsinin 40%-i heç zaman internetə daxil olmayıb.
Bu, həmin insanların rəqəmsal bacarıqlarının lazımi səviyyədə olmamasından və onların smartfon alma imkanından məhrum olmalarından irəli gəlir. GSMA internetin hansı regionlar üzrə bölüşdürüldüyü barəsində məlumat verməsə də bu sahədə çalışan mütəxəssislərin fikirlərinə əsasən aşağı və orta gəlir səviyyəsinə sahib ölkələrdə və o cümlədən kənd ərazilərində vəziyyət daha da pisdir. Lakin müsbət tendensiya da müşahidə edilir. Belə ki, son 5 il ərzində Yer kürəsi əhaləsinin 13%-i internetə qoşulub. Son 1 il ərzində isə internet istifadəçilərinin sayı 300 milyon insan artıb.
Bu tendensiyanın artma tempini qoruyub saxlamaq üçün GSMA bütün ölkələri və təşkilatları şəbəkənin daha geniş yayılması məsələsini prioritetli məsələ kimi qəbul etməyə çağırır. Bunun üçün baza stansiyaları inşa edilməli, smartfonların və şəbəkə xidmətlərinin qiymətləri isə aşağı salınmalıdır. Mütəxəssislərin sözlərinə əsasən bəziləri üçün internet müəyyən məlumatları, tibbi köməkliyi və xəbərləri əldə etmək üçün yeganə imkandır. Hətta bəziləri üçün internet yeganə gəlir mənbəyidir. Bu səbəbdən də internet şəbəkəsinin daha geniş yayılması öz növbəsində iqtisadiyyatın bərpası sürətini yüksəldəcək, sosial stabilliyi yaxşılaşdıracaq və insanların həyat keyfiyyətlərinə müsbət təsir göstərəcək.
