Google Search süni zəka tərəfindən tərtib edilmiş fotoların təyini üzrə yeni imkanlar əldə edəcək
11.05.2023 /
Google şirkəti dezinformaisya ilə mübarizə yolunda yeni addımlar atmağa davam edir. Şirkət süni zəka vasitəsilə tərtib edilmiş fotoların avtomatik şəkildə təyin edilməsinə hədəflənib. Google I/O 2023 konfransı çərçivəsində şirkət bu istiqamətdə reallaşdırılan yeni funksiyaları təqdim edib. Yeni funksiyalar nəticə etibarilə Google Search-ə inteqrasiya ediləcək. İstifadəçilər axtarış nəticələrində ortaya çıxan fotolar barəsində daha çox məlumat əldə edə biləcəklər. Bununla yanaşı süni zəka vasitəsilə tərtib edilmiş fotolar axtarış nəticələrində xüsusi işarəyə sahib olacaqlar. Google bildirib ki, bu yeni imkanlar vasitəsilə istifadəçilər bu və ya digər fotonun reallığı əks etdirib-etdirmədiyini sürətlə təyin edə biləcəklər.
Lakin çətin ki, bu cür funksiyalar dezinformasiya problemini tamamilə aradan qaldıra bilsin. Belə ki, fotoların çox hissəsi ümumiyyətlə Google ekosistemindən kənarda sərgilənir. Bununla belə yaxın aylar ərzində Google Search-də istifadəyə veriləcək bu imkanlar müəyyən dərəcədə istifadəçilərə yardımçı olmalıdırlar. İstifadəçilər fotoların Google tərəfindən nə zaman indeksləndiyini, bu və ya digər fotonun ilk dəfə harda ortaya çıxdığını və daha hansı platformalarda paylaşıldığını öyrənə biləcəklər. Bu cür axtarış üsulu istifadəçini faktların yoxlanması ilə məşğul olan saytlara gətirib çıxara bilər. Həmin saytlar vasitəsilə isə istifadəçi bu və ya digər fotonun süni zəka vasitəsilə tərtib edilib-edilmədiyini təyin edə bilər.
