Kosmik hava durumu və proqnozu açıqlanıb
13.06.2023 /
Kosmik hava durumu - Hesabat dövrü ərzində Günəş aktivliyi orta səviyyədə olub, maksimum aktivlik 3327 oblastında M 4.7 qeydə alınmışdır. Hesabat dövründə alışmalara bağlı olaraq II tip radioemissiya qeydə alınmışdır. Günəş ləkələri azalmış, 8 ləkə qrupu və 116 ləkə qeyd edilmişdir. Yerə qismən istiqamətlənmiş CME (Coronal Mass Ejections - Tac Kütlə Atılmaları) qeydə alınmışdır. Günəşin səthində Tac dəlikləri müşahidə olunur.
Şamaxı Astrofizika Rəsədxanasından verilən məlumata görə, enerjisi 2 MeV-dən çox olan elektron seli normal və orta səviyyədə (maks: 253 pfu), 10 MeV-dən çox enerji yüklü proton seli isə fon səviyyəsində olmuşdur.
Hesabat dövründə Günəş küləyinin sürəti azalaraq maksimum 479 km/san olmuşdur. Planetlərarası maqnit sahəsi isə həftəsonuna artaraq 15 nT, radial istiqamətdə isə -8 nT olmuşdur. Hal-hazırda Günəş küləyinin sürəti 433 km/san, planetlərarası maqnit sahəsinin qiyməti Yer orbitində 6.74 nT, radial istiqamətdə isə 3.91 nT təşkil edir.
Hesabat dövrü ərzində Yerə istiqamətlənmiş CME-in təsiri gözlənilsə də, Yerə çatana qədər zəifləmiş və geomaqnit qasırğası baş verməmişdir. Hal-hazırda geomaqnit sahəsi sakitdir (Kp=2).
Kosmik hava proqnozu - Proqnoz günlərində (12- 19 iyun) C sinif alışmanın baş vermə ehtimalı 99%, M (R1-R2) sinif alışmanın baş verməsi ehtimalı 20%, X (R3) sinif isə 5% təşkil edir.
2 MeV-dən çox enerjili elektron selinin yüksək səviyyələrə qalxmaq ehtimalı var, enerjisi 10 MeV-dən çox olan proton selinin fon səviyyəsində olacağı gözlənilir.
Günəş küləyinin sürətinin müsbət qütblü CH HSS (Coronal Hole High Speed Streams - Tac Dəliklərindən çıxan Yüksək Sürətli Zərrəciklər selinin) və 8-9 iyunda baş vermiş CME-lərin təsiri ilə yenidən sürətlənəcəyi gözlənilir.
Geomaqnit sahəsinin müsbət qütblü CH HSS-in təsiri ilə 12-13 və 16 iyun tarixlərində aktiv olacağı gözlənilir. Geomaqnit qasırğası proqnozlaşdırılmır.
