Alimlər beyin xərçəngin müalicəsi üçün effektiv üsul hazırlayırlar

17.07.2023 /

ABŞ-ın Harvard Tibb Məktəbinin alimləri nadir rast gəlinən beyin şişi - papilyar kraniofarinqioma üçün yeni müalicə üsulu hazırlayıblar. Terapiya şişlərin kiçilməsində görünməmiş müvəffəqiyyət göstərib. Tədqiqatın nəticələri "New England Journal of Medicine" nəşrində dərc olunub. Tədqiqat 16 xəstəni əhatə edib, onlardan 15-i vemurafenib və kobimetinib kombinasiyası ilə azı 28 günlük terapiya kursunu tamamlayıb. Dörd dövr ərzində şiş ölçüsündə orta azalma 68%-dən 99%-ə qədər (orta hesabla 91%) dəyişib. Yeddi xəstə eksperimental terapiyanın dayandırılmasından sonra başqa müalicə almayıb. Altı pasiyentin təxminən iki illik müayinəsi şişin böyümədiyini üzə çıxarıb. Müalicə zamanı xəstələrin heç birində şiş böyüməyib, ölən olmayıb.

"Bir və ya daha çox terapiya dövrünü tamamlayan bütün xəstələr müalicəyə cavab verdilər, bu, beyin şişləri üçün hər hansı tibbi müalicəyə ən yüksək cavab nisbətidir", - alimlər bildiriblər. Tədqiqatçılar bununla belə terapiya dövrlərinin optimal sayını müəyyən etmək üçün daha çox araşdırmaya ehtiyac olduğunu vurğulayıblar.

aqreqator.az