Google Search-ün süni zəka əsaslı axtarış üsulu foto və videolar ilə zənginləşdirilib
03.08.2023 /
Google şirkətinin süni zəka əsaslı Search Generative Experience (SGE) adlı sistemi yeni faydalı funksiyanı əldə edib. Söhbət, axtarış nəticələrinə foto və videoların daxil edilməsindən gedir. Google Search-ün Search Labs bölməsində SGE-ni aktivləşdirmiş test iştirakçıları öz axtarış nəticələrindəki əsas məlumatların üst hissəsində bundan sonra daha çox multimedia elementlərini görə biləcəklər. Google bildirib ki, o, multimedia elementlərinin istifadəçilərə sürətli şəkildə sərgilənməsi və sərgilənən linklərdə daha çox məlumatın əks olunması üzərində çalışır.
Qeyd etmək lazımdır ki, SGE funksiyası hələ təcrübi funksiya statusunu daşıyır. Lakin Google hesab edir ki, internetdəki axtarış prosesinin gələcəyi məhz budur. Bununla yanaşı sözügedən funksiya reallaşdırmaqda çox qəlizdir və bu səbəbdən də onu düzgün şəkildə hazırlamaq lazımdır. Google istifadəçiyə təkcə axtarış sorğusuna müvafiq olan linkləri təqdim etməyə çalışmır. Şirkət əksinə bu prosesi sintez etməyə və həmin sintez əsasında istifadəçiyə doğru və faydalı cavabları təqdim etməyə çalışır.
Bu mövzuda video faydalı element hesab edilir. Bu mənada Youtube servisi axtarış nəticələrində daha çox yer tutmağa başlayıb. SGE sistemində əsas problemlərdən biri onun çalışma sürətidir. Çat-botlar istifadəçilərin sorğularına bir neçə dəqiqə ərzində cavab verirlər. Axtarış sistemi isə istifadəçiyə nəticələri anında təqdim etməlidir. Lakin Google yaxın zamanda bu problemi aradan qaldıracağına söz verib.
