Windows-la çalışan yeni kompüterlərin klaviaturalarına ayrıca Copilot düyməsi əlavə ediləcək
08.01.2024 /
Microsoft şirkəti süni zəka köməkçisi olan Copilot-un işə salınması üçün nəzərdə tutulmuş ayrıca fiziki düymənin Windows əməliyyat sistemli yeni kompüterlərə quraşdırılacağını elan edib. Copilot üçün nəzərdə tutulmuş ayrıca fiziki düymə kompüter klaviaturalarının aşağı sol hissələrində olan Alt düyməsinin yanında yerləşəcək. Şirkət bildirib ki, bu, 1990-cı illərdə klaviaturalara Windows düyməsinin inteqrasiya edilməsindən indiyənə kimi klaviaturalardakı ən vacib dizayn dəyişikliyi olacaq. Copilot düyməsinin yeni Surface kompüterlərinə inteqrasiya ediləcəyi dəqiqdir. Lakin bunu hansı kənar şirkətlərin öz cihazlarında reallaşdıracağı məlum deyil. Çox güman ki, Copilot düyməsini öz kompüterlərinə inteqrasiya edəcək kənar şirkətlərin adları CES 2024 sərgisində açıqlansın.
