Google Play-də bir neçə tətbiqi paralel olaraq yükləmək mümkün olacaq
13.03.2024 /
Google Play-in yeni versiyasında faydalı funksiya barəsində məlumat ortaya çıxıb. Söhbət, Google şirkətinin illər öncə barəsində məlumat vermiş olduğu funksiyadan gedir. Belə ki, yaxın zamanda Google Play-də paralel olaraq bir neçə tətbiqin yüklənməsi funksiyası istifadəyə veriləcək. Şirkət sözügedən funksiyanın testinə artıq start verib. Hal-hazırda paralel olaraq bir neçə tətbiqi və ya bir neçə tətbiq üçün nəzərdə tutulmuş yenilənməni yükləmək istəyən zaman onlar cihaza sıra ilə yüklənirlər. Lakin Google Play üçün test edilən yeni funksiya sayəsində tətbiqlər və yenilənmələr paralel olaraq yüklənə biləcəklər. Bu cür özəllik artıq Apple şirkətinin App Store platformasında mövcuddur. Məlumata əsasən Google Play-in koduna 5 tətbiqin paralel yüklənməsi imkanı inteqrasiya edilib. Lakin test çərçivəsində şirkət yalnız iki tətbiqin paralel yüklənməsini aktivləşdirib. Funksiyanın nə zaman istifadəyə veriləcəyi bilinmir.
