Tarixdə ilk dəfə olaraq bir peyklə Bluetooth bağlantısı qurulub!
08.05.2024 /
Hubble Şəbəkəsi çoxlarının qeyri-mümkün hesab etdiyi bir nailiyyət əldə edə bilib. Şirkət kosmosla birbaşa Bluetooth bağlantısı quraraq buna nail olan tarixdəki ilk şirkət oldu.
Bu ilin əvvəlində Seattle-də yerləşən startap şirkəti Kaliforniyadakı Vandenberg Kosmik Qüvvələri Bazasındakı SpaceX-in "Transporter-10 rideshare" missiyası ilə ilk 2 peykini orbitə çıxarıb. O vaxtdan bəri şirkət 600 km məsafədə sadə 3,5 mm-lik Bluetooth çipindən siqnal qəbul etməyə müvəffəq olub.
Şirkətə görə, istənilən Bluetooth cihazını Hubble-ın peyk şəbəkəsinə proqram təminatı yeniləməsi ilə qoşmaq (hətta mobil siqnal olmadan) potensial olaraq qlobal əhatə dairəsini 20 dəfə az batareya sərfiyyatı və 50 dəfə aşağı əməliyyat xərcləri ilə təmin edə bilər. Mövcud aşağı gücə malik, aşağı qiymətli sensorlarla bahalı kosmik aparatlara ehtiyac olmadan saysız-hesabsız proqramlar inkişaf etdirilə bilər. Hubble Network artıq istehlakçı cihazları, tikinti, infrastruktur, təchizat zənciri, logistika, neft və qaz və müdafiə kimi müxtəlif sahələrdə pilot müştərilərlə əməkdaşlıq etdiyini bildirir.
Hubble, 2021-ci ildə Life360-ın həmtəsisçisi Haro, Iotera qurucusu Ben Wild və aerokosmik mühəndis John Kim tərəfindən təsis edilib. Bluetooth çipini peykə qoşmaq ideyası ilk dəfə Haroya təqdim olunanda o, bunu dəlicəsinə bir fikir olaraq hesab edirdi. Lakin mövcud yerüstü və peyk şəbəkələrinin qeyri-adekvat olması, xüsusilə ucqar ərazilərdə əhatə dairəsi problemləri, həddindən artıq enerji sərfiyyatı və yüksək istismar xərcləri bu ideyanı cəlbedici edib.
