Bakı şəhəri təhsil işçilərinin sentyabr konfransı keçirilib
11.09.2024 /
Konfransda elm və təhsil naziri Emin Əmrullayev, Dövlət İmtahan Mərkəzinin İdarə Heyətinin sədri Məleykə Abbaszadə, ali məktəb rektorları, millət vəkilləri, Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin və Bakı Şəhəri üzrə Təhsil İdarəsinin müvafiq struktur bölmə rəhbərləri, ictimaiyyət nümayəndələri, məktəb direktorları, məktəbəqədər və məktəbdənkənar təhsil müəssisələrinin rəhbərləri iştirak ediblər.
Konfrans iştirakçılarını salamlayan elm və təhsil naziri Emin Əmrullayev ötən tədris ilində əldə olunan nailiyyətlərdən, aparılan təhsil islahatlarından, mövcud problemlər və onların həlli istiqamətində atılan addımlardan söz açıb, perspektivdə nəzərdə tutulan məsələlərdən, yeni tədris ilinin əsas hədəflərindən bəhs edib.
MÜTDA-nın direktor müavini, BŞTİ-nin müdiri vəzifəsini müvəqqəti icra edən Nərminə Hüseynova 2023-2024-cü tədris ilində İdarənin fəaliyyət istiqamətləri üzrə gördüyü işlər haqqında hesabat məruzəsi ilə çıxış edib.
Daha sonra konfrans panel müzakirələrlə davam edib.
Panel müzakirələrdə elm və təhsil naziri Emin Əmrullayev, Dövlət İmtahan Mərkəzinin İdarə Heyətinin sədri Məleykə Abbaszadə, Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov, MÜTDA-nın direktor müavini, BŞTİ-nin müdiri vəzifəsini müvəqqəti icra edən Nərminə Hüseynova iştirak edib.
Dövlət İmtahan Mərkəzinin İdarə Heyətinin sədri M.Abbaszadə yeni dərs ilinin başlanması münasibətilə təhsil işçilərini təbrik edib. Sədr buraxılış və qəbul imtahanlarının nəticələri haqqında məlumat verib və lazımi imtahan materialların hazırlanması, müəllimlərin bu prosesdə iştirakı, onların ekspert kimi formalaşması və inkişafı məsələlərinə toxunub.
Panel müzakirədə konfrans iştirakçılarının fikirləri də dinlənilib və qonaqların, ekspertlərin təklif və tövsiyələrinə yer verilib, sualları cavablandırılıb.
