İnternet arxivinin sındırılması nəticəsində 31 milyon istifadəçinin məlumatları sızdırılıb
14.10.2024 /
İnternetin bütün tarixini özündə birləşdirən archive.org adlı unikal platforma hakerlər tərəfindən kiberhücuma məruz qalıb. Nəticədə 31 milyon istifadəçinin məlumatları sızdırılıb. Sızdırılmış məlumatlar arasında istifadəçilərin elektron poçt ünvanları, adları və müxtəlif şifrələri yer alıblar. İstifadəçilər gecə saatlarında archive.org saytının ana səhifəsində belə bir bildirişlə qarşılaşıblar. “Sizə nə vaxtsa elə gəlibmi ki, Internet Archive vicdan üzərində dayanıb və daimi olaraq məlumatların fəlakətli şəkildə sızıdırılması astanasındadır? Bu elə indicə baş verdi. Sizlərdən 31 milyonunu HIBP-də görəcəyik!”. Bu bildirişin əks olunmasından sonra sayt müəyyən müddət ərzində deaktiv olub.
Daha sonra archive.org-un təsisçisi Brewster Kahle sosial şəbəkələr üzərindən xəbər verib ki, sayt DDoS hücuma məruz qalıb. Sayt öz işini bərpa etsə də, sızdırılmış məlumatlar barəsində söhbətlər səngimək bilmir. DDoS hücum öz növbəsində saytın qısa müddətlik deaktivliyinə səbəb olsa da, əsas səs-küyü məhz məlumatların sızdırılması halı yaradıb. Qeyd etmək lazımdır ki, kiberhücum çərçivəsində saytın ana səhifəsinə yerləşdirilmiş bildirişdəki HIBP hissəsi Have I Been Pwned servisinin adının qısaldılmış versiyasıdır. Bu servis istifadəçilərə konfidensial məlumatların oğurlanıb-oğurlanmadığını yoxlamağa imkan verir. Servis öz növbəsində məlumatların sızdırılması halını təsdiqləyib və bildirib ki, archive.org 1 ay bundan öncə sındırılıb. Nəticədə hakerlər 31 milyon istifadəçinin məlumatlarını oğurlayıblar.
