Pekin Universiteti və Pekin Texnologiya İnstitutunun alimləri 10 000 dəfə şarj dövründən sonra ilkin tutumunun 99%-ni saxlaya bilən bərk cisimli alüminium batareyası hazırlayıblar. Bu ixtira, ənənəvi litium-ion batareyaları ilə müqayisədə enerji saxlama müddətini əhəmiyyətli dərəcədə uzatmağı vəd edir. Aparılmış sınaqlar zamanı yeni növ batareyanın prototipi deşilmələrə, qısaqapanmalara və 1000 dərəcə Selsiyə qədər qızdırılmaya məruz qalsa da, heç bir sızma, yanğın və ya partlayışa səbəb olmayıb.

 

 

Hətta 200 dərəcə Selsi temperaturda belə, gərginlik otaq temperaturundakı səviyyədə qalıb ki, bu da batareyanın ekstremal şəraitdə işləməyə davam edə bildiyini sübut edir. Bu texnologiya alüminium xloriddən ibarət maye elektrolitin istifadəsinə əsaslanır. Adətən bu maddə korroziyaya səbəb olur, lakin alüminium ftorid və xüsusi duz örtüyünün əlavə edilməsi elektrodlar üzərində korroziyanın qarşısını alan  bərk cisimli sistem yaratmağa imkan verib. Alüminium ftorid yuyulub təkrar istifadə oluna bilər və demək olar ki, eyni miqdarda geri qaytarılır. Alüminium da səmərəli şəkildə emal oluna bildiyi üçün bu texnologiya tullantısız istehsal baxımından perspektivli hesab edilir.