Gənc alimlərin forumu mütəxəssislərə potensiallarını göstərmək üçün imkan yaradacaq
02.12.2022 /
Dekabrın 2-də Azərbaycanın 44 günlük Vətən müharibəsində Qələbəsinə həsr olunmuş “Qafqazda təhlükəsizlik və çağırışlar” adlı gənc alimlərin respublika forumu ilə əlaqədar mətbuat konfransı keçirilib.
Mətbuat konfransında çıxış edən STEM Analitik Mərkəzinin rəhbəri Orxan Yolçuyev forumun əsas məqsədinin beynəlxalq münasibətlər, diplomatiya, politologiya, beynəlxalq hüquq və tarix sahələrində potensial alimləri üzə çıxarmaq olduğunu deyib. Onun sözlərinə görə, forum gənc mütəxəssislərə potensiallarını göstərmək üçün imkan yaradır. Bildirib ki, Vətən müharibəsindən sonra Azərbaycan dünyada öz rolunu gücləndirib və buna görə gənc mütəxəssislərə ehtiyac yaranıb.
Politoloq İlqar Vəlizadə bildirib ki, forum gənc alimlər üçün öz tədqiqat potensialını göstərmək, nitq bacarıqlarını inkişaf etdirmək və Azərbaycanı gələcəkdə dünya miqyasında təmsil etmək üçün unikal imkandır. Qeyd edib ki, hələ də regionda sabitliyi pozmağa çalışan oyunçular var. Bu, çox təhlükəli oyundur. Tarixən üçüncü ölkələr regionda öz maraqlarını təmin etməyə çalışıblar. Ekspertin fikrincə, “3+3” formatının əsas məqsədi odur ki, region ölkələr üçüncü dövlətlərin müdaxiləsi olmadan bütün problemlərini özləri həll etsinlər. Ən başlıcası regionda sabit siyasi, iqtisadi və elmi mərkəzlərin yaradılmasıdır ki, bu da bütün regionun gələcək inkişafına töhfə verəcək.
Qeyd edək ki, forum Azərbaycan Milli Elmlər Akademiyasının Qafqazşünaslıq İnstitutu ilə birgə STEM Analitik Mərkəzinin təşkilatçılığı ilə dekabrın 19-da keçiriləcək.
