Kosmik hava durumu və proqnozu açıqlanıb
02.09.2024 / Конференции, собрания
Kosmik hava durumu – Hesabat dövrü ərzində Günəş fəallığı nisbətən azalmışdır. Maksimal sinifli alışma 3806 regionunda baş vermiş M5.5 sinifli alışma olmuşdur. Alışmalara bağlı olaraq II tip radioemissiya və radiosiqnalların ötürülməsində R2 səviyyəli fasilələr qeydə alınmışdır. Günəşin səthində ləkələrin sayı azalaraq 10 ləkə qrupunda 156 ləkə və geoeffektiv olmayan Tac dəlikləri müşahidə olunur. Həftə ərzində bir neçə Tac Kütlə Atılması (TKA) qeydə alınmışdır, son alışmaya bağlı baş vermiş TKA-nın Yerə deyil, Veneraya təsir göstərəcəyi proqnozlaşdırılır.
Elm və Təhsil Nazirliyinin Şamaxı Astrofizika Rəsədxanasından verilən məlumata görə, enerjisi 2 MeV-dən çox olan elektron seli normal və orta səviyyədə, 10 MeV-dən çox enerji yüklü proton seli isə fon səviyyəsində olmuşdur.
Hesabat dövründə Günəş küləyinin maksimal sürəti 498 km/san, Yer orbitində planetlərarası maqnit sahəsinin maksimal qiyməti 20 nT, radial istiqamətdə isə -14 nT olmuşdur. Hal-hazırda Günəş küləyinin sürəti normaldır (397 km/san), planetlərarası maqnit sahəsinin maksimal qiyməti Yer orbitində 5.4 nT, radial istiqamətdə isə 0.3 nT təşkil edir. Kp indeksi 2-ə bərabərdir və kosmik hava sakitdir.
Hesabat dövrü ərzində geomaqnit sahəsinin intensivliyi TKA-ın təsiri ilə 28 avqustda qısa müddətli G2, 30-31 avqustda isə fasilələrlə G1 səviyyəsinə yüksəlmişdir.
Kosmik hava proqnozu – Proqnoz günlərində (02-08 sentyabr) C sinif alışmanın baş verməsi ehtimalı 99%, M (R1-R2) sinif alışmanın baş verməsi ehtimalı 60%, X (R3) sinif alışmanın baş verməsi ehtimalı isə 10% təşkil edir.
Enerjisi 2 MeV-dən çox olan elektron selinin normal və orta səviyyədə olacağı, 10 MeV-dən çox enerji yüklü proton selinin isə 02-04 sentyabr tarixlərində baş vermiş M5.5 sinifli alışma ilə əlaqəli olaraq S1 səviyyəsinə yüksəlməsi ehtimalı var.
Günəş küləyinin Günəş küləyinin sürəti də alışmanın təsiri ilə yüksələ bilər.
Geomaqnit sahəsinin sakit-aktiv səviyyələrdə olacağı proqnozlaşdırılır. Geomaqnit qasırğası gözlənilmir.
