BDU-nun nəzdində yeni Tədqiqat, İnkişaf və İnnovasiyalar üzrə Mükəmməllik Mərkəzi yaradılıb
26.01.2022 /
Bakı Dövlət Universitetinin (BDU) nəzdində yeni Tədqiqat, İnkişaf və İnnovasiyalar üzrə Mükəmməllik Mərkəzi yaradılıb.
Bu barədə AZƏRTAC-a BDU-dan məlumat verilib. Bildirilib ki, öz istedad və imkanlarına güvənən innovativ, yaradıcı tədqiqatçıları cəlb etmək, yeni nəsil alimlərin yetişməsinə töhfə vermək, təhsil və elm sahəsində transformativ təkmilləşdirmələr aparmaq, bir sözlə, təhsil, elm və sənayeni uzlaşdırmaq məqsədilə yaradılan mərkəzdə ümumilikdə 9 laboratoriyada 70-dən çox tədqiqatçı fəaliyyət göstərəcək.
Mərkəzdə yaradılacaq yeni sənayeyönümlü laboratoriyalarda tədqiqatçılar – alimlər, tələbələr, magistrant və doktorantlar, eləcə də sənayedə çalışan peşəkar mütəxəssislər sənaye və biznes sektorları üçün yeni həllər işləyib hazırlayacaq, elm və təhsil sektorunu sənaye və biznes dünyasına daha da yaxınlaşdıracaqlar.
Mərkəzin əsas ilkin hədəfi sənaye sektorları – neft və qaz sənayesi, mədənçilik, kənd təsərrüfatı və qida təhlükəsizliyidir. Tədqiqat istiqamətləri isə nanotexnologiyalar, molekulyar biologiya və virusologiya, biotexnologiya, sənaye kimyası, analitik kimya, ekologiya, Yer elmləri, astrokosmik və atmosfer elmləri, həmçinin rəqəmsal tədqiqatlardır. Qeyd olunan sahələrdə bir sıra layihələrin icrasına artıq başlanılıb.
Hazırda ölkənin sənaye sektorunda fəaliyyət göstərən bir sıra müəssisələr laboratoriya ölçmələrini ölkə hüdudlarından kənarda aparmağa məcburdur. BDU-nun Tədqiqat, İnkişaf və İnnovasiyalar üzrə Mükəmməllik Mərkəzi kimi qurumların sayəsində isə bunu Azərbaycanda da həyata keçirmək mümkün olacaq. Mərkəzin fəaliyyəti nəticəsində tədqiqatçılar beynəlxalq standartlara cavab verən yeni mühitdə fəaliyyət göstərəcək, beynəlxalq təcrübədən yararlanacaqlar. Mərkəzdə yeni nəsil tədqiqatçılar üçün geniş imkanlar yaradılacaq.
Azərbaycanda ilk dəfə yaradılan bu tipli mərkəzin əsas xüsusiyyətlərindən biri də onun təkcə BDU-nun tələbə və əməkdaşları üçün deyil, ölkənin bütün yüksəkixtisaslı tədqiqatçıları, istedadlı tələbələri üçün açıq olmasıdır.
Mərkəz Kiçik və Orta Biznesin İnkişafı Agentliyi (KOBİA) ilə birgə əməkdaşlıq çərçivəsində innovativ həllər üçün qarşılıqlı maraq əsasında dövlət, özəl və sənaye sektoru arasında tərəfdaşlığın inkişaf etdirilməsinə dəstək verəcək. Bunun üçün tələbələr və gənc tədqiqatçılar arasında innovativ sahibkarlıq fəaliyyətinin təşviqi məqsədilə BDU-da KOBİA-nın dəstəyi ilə İnkubasiya və Akselerasiya Kolabı da təşkil ediləcək.
BDU-nun təsis etdiyi “BUİLD” Məhdud Məsuliyyətli Cəmiyyəti texnologiya transfer ofisi kimi mərkəzin infrastrukturundan gənclərin faydalanması, özəl sektorla universitet arasında əməkdaşlıq imkanlarının inkişaf etdirilməsi, startaplar və biznes ideyaları üzrə “nəzəriyyədən biznesə” prinsipinin reallaşdırılması istiqamətində fəaliyyət göstərir.
