13 may 2022-ci il tarixində Şuşa şəhər 1 saylı tam orta məktəbin akt zalında “Şuşanın Rəqəmsal Müəllimləri”  layihəsi çərçivəsində keçirilən təlim və tədbirlərin bağlanış mərasimi keçirilib.

 

Layihənin bağlanış mərasimində Qarabağ Regional Təhsil İdarəsinin tabeliyində olan Şuşa Rayon Təhsil Şöbəsinin layihələr üzrə rəhbəri və  məsləhətçisi Aydan Bağırova, AMEA İdarəetmə Sistemləri İnstitutunun elmi işçisi və doktorantı Səyyarə Hidayətzadə, Azərbaycan Gənc Müəllimlər Assosiasiyasının sədri Rüfət Əsədzadə, Azərbaycan Gənc Müəllimlər Assosiasiyasının idarə heyətinin üzvü Hüseyn Hüseynov, Şuşa 1 nömrəli tam orta məktəbin direktoru Gülnar Qurbanova iştirak ediblər.

 

Azərbaycan Gənc Müəllimlər Assosiasiyasının (AGMA) sədri Rüfət Əsədzadə və layihə rəhbəri Hüseyn Hüseynov 2022-ci il Şuşa ilində həyata keçirilən “Şuşanın Rəqəmsal Müəllimləri” adlı tədbirlərin təşkili layihəsinin əhəmiyyətini vurğuladılar. Təlimlərdə təlimçi-ekspert olan Səyyarə Hidayətzadə texnologiyanın tədrisə çox böyük kömək olacağından söz açıb və əməkdaşı olduğu İnstitutun rəhbərliyi adından bu tip təlim və tədbirlərə hər zaman istənilən köməyi göstərməyə hazır olduqlarını nəzərə çatdırıb.

 

Qeyd edək ki, layihəyə müraciət edən  300 müəllimdən 50 müəllim seçilərək təlimlərə cəlb edilmişdi. Bağlanış mərasimində layihədə iştirak edən müəllimlərə sertifikatlar təqdim edildi.

 

Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə həyata keçirilən layihənin əsas məqsədi distant təhsilin təşkili prosesində müəllimlərdə “Google for Education” platformasından istifadə bacarıqlarını formalaşdırmaqdan ibarətdir.