ATV kanalında YTP-nin innovativ layihələri ilə bağlı süjet yayımlanıb
18.05.2022 /
ATV kanalında yayımlanan “ATV Səhər” informativ-əyləncəli proqramında AMEA-nın Yüksək Texnologiyalar Parkının (YTP) rezidenti “Elm və Texnologiyalar Parkı” MMC və inkubator-rezidenti “Troniq” MMC-nin innovativ layihələri ilə bağlı videosüjet yayımlanıb.
Bildirilib ki, texnoloji məhsulların istehsalı sahəsində bir sıra uğurlu layihələrə imza atmış “Elm və Texnologiya Parkı” MMC-nin əsas hədəfi dronların hərbi, mülki, kənd təsərrüfatı və digər sahələrdə tətbiq sahələrini genişləndirə biləcək digər cihazlarla inteqrasiyasının genişləndirilməsi, sərhədlərin, xüsusi mühafizə olunan sahələrin, o cümlədən hava limanlarının mühafizəsində bu sistemlərdən səmərəli istifadənin təşkilinə dəstək verilməsidir.
Süjetdə müəssisənin dronları barədə məlumat verən “Elm və Texnologiyalar Parkı” MMC-nin əməkdaşı Nadir Babaxanov “NF010” dronunun imkanlarından danışıb. Bildirib ki, kənd təsərrüfatı, hərbi məqsədlər və digər sahələrdə tətbiq imkanlarına malik bu dronlar ərazilərin fotoçəkilişlərini avtomatik olaraq icra edir.
Videosüjetdə, həmçinin YTP-nin inkubator-rezidenti “Troniq” MMC-nin süni intellektlə çalışan robotu barədə müəssisənin direktoru Anar Nəbiyev məlumat verib. Onun sözlərinə görə, yoluxucu xəstəliklərin, virusların və mikrobların yayılmasının qarşısını almaq üçün hazırlanmış süni intellekt əsaslı robot dezinfeksiya işlərini həyata keçirir. Öncədən müəyyən edilmiş marşrut üzrə hərəkət edən və bütün maneələri aşan bu robot virusları 99,9 faiz məhv edə bilmək imkanına malikdir.
