Ölkəmiz Türkiyədə keçirilən beynəlxalq türk dünyası simpoziumunda təmsil olunur
10.10.2022 /
Türkiyənin Ərzincan vilayətində “Türk Dünyası Ərzincanda Görüşür” mövzusunda beynəlxalq simpozium keçirilir.
Türkiyənin hakim Ədalət və İnkişaf Partiyası sədrinin birinci müavini, Türk Dövlətləri Təşkilatının Ağsaqqallar Şurasının sədri Binəli Yıldırımın başçılığı ilə keçirilən tədbirdə ölkəmiz geniş heyətlə təmsil olunur.
Ərzincan Binəli Yıldırım Universitetinin ev sahibliyi ilə keçirilən tədbir Türkiyənin Mədəniyyət və Turizm Nazirliyinin himayəsi ilə baş tutub.
Dörd gün davam edəcək simpoziumun əsas məqsədi türk dünyasının dil, ədəbiyyat, tarix, sənət, enerji, diaspora, ticarət, beynəlxalq münasibətlər kimi bir çox sahələr üzrə elmi araşdırmalara ortaq platforma yaratmaqdır.
Tədbirdə müxtəlif ölkələri əhatə edən bir çox mövzularla yanaşı, “Qarabağ Zəfəri və Azərbaycan Ordusunun Tarixi Qələbəsi Türkiyə Mətbuatında”, “Qarabağ Zəfəri və Qars-İğdır-Naxçıvan Dəmiryolunun Əhəmiyyəti”, “Zəngəzur Dəhlizi və Onun Strateji Əhəmiyyəti”, “Xocalı Soyqırımı”, “Azərbaycan Bəstəkarlarının Yaradıcılığında Muğamın Rəngləri”, “Əhməd Ağaoğlu”, “Üzeyir Hacıbəyli”, “Hüseyn Cavid”, “Həsən Bəy Zərdabi” kimi bir çox mövzularda panel iclaslar keçiriləcək.
