Xaricdə təhsil almış 20 nəfərin diplomu təsdiqlənməyib
02.12.2022 /
Noyabr ayı üzrə 230 müraciətçinin 210-u barədə müsbət qərar verilərək müvafiq şəhadətnamələr təqdim edilib, 20 nəfərin müraciəti isə mənfi qərarla yekunlaşıb.
Bu barədə Təhsildə Keyfiyyət Təminatı Agentliyindən məlumat verilib.
Təhsil ölkəsində tələb olunan minimal müddətin ödənilmədiyi, həm də tədris dilinin qənaətbəxş olmaması səbəbindən 8, tədris yükünü mənimsəmək üçün təhsil aldığı ölkənin ərazisində kifayət qədər olmaması səbəbindən 5, dili üzrə bilik səviyyəsinin qənaətbəxş olmaması səbəbindən 3, digər səbəblər üzrə 4 nəfərin müraciəti mənfi qərarla yekunlaşıb.
Ölkələr üzrə müraciətlərin sayına nəzər saldıqda Türkiyə Respublikasından 65, Rusiya Federasiyasından 64, Ukraynadan 53, Gürcüstandan 12, Böyük Britaniya və Şimali İrlandiya Krallığından 7, digər ölkələrdən isə 29 müraciətin olduğu müşahidə edilir.
Ən çox müraciət olunan ixtisaslara gəlincə, iqtisadiyyat 28, hüquqşünaslıq üzrə 21, stomatologiya üzrə 15, tibb üzrə 12, biznesin idarə edilməsi üzrə 10 müraciətçi qeydə alınıb.
Bildirilib ki, sənədlərə orta hesabla 12 gün ərzində baxılıb.
