SpaceX şirkətinin bazar dəyəri 137 milyard dollara yüksəlib
05.01.2023 /
Elon Musk-a məxsus olan SpaceX şirkəti özəl şirkət olaraq qalır. Buna görə də o öz maliyyə göstəricilərini açıq şəkildə təqdim etməmə imkanına sahibdir. Bu səbəbdən də onun biznesinin hansı vəziyyətdə olmasını yalnız kənar göstəricilər vasitəsilə təyin etmək olar. CNBC-nin verdiyi məlumata əsasən SpaceX bir neçə müddət bundan öncə 750 milyon dollar dəyərində investisiya əldə edib. Bu səbəbdən də şirkətin bazar dəyəri 137 milyard dollara yüksəlib. Hələ keçən ay məlumat ortaya çıxmışdı ki, şirkət öz səhmlərinin bir hissəsini kənar investorlara 77$-dan satmağı planlaşdırır. Keçən il ərzində şirkət ümumilikdə 2 milyrd dollar investisiya əldə etmişdi. 2022-ci ilin may ayındakı göstəricilərə əsasən isə SpaceX-in bazar dəyəri 127 milyard dollar təşkil etmişdi.
Məlumata əsasən isə şirkət yeni investisiya raundu çərçivəsində 750 milyon dollar əldə edib. SpaceX-in keçən ilki aktivliyini birmənalı qiymətləndirmək olmaz. Bir tərəfdən şirkət öz planlarında vacib nailiyyətlər əldə etdi. Digər tərəfdən isə şirkət dəfələrlə Starship kosmik gəmisinin uçuş testini təxirə salmalı oldu. Qeyd etmək lazımdır ki, NASA-nın növbəti Ay missiyalarında məhz Starship iştirak edəcək. Onun ilk uçuş testlərinin nə zaman baş tutacağı isə bilinmir. Şirkətin peyk interneti layihəsi olan Starlink-ə gəldikdə o, keçən ilin sonuna kimi öz istifadəçi kütləsini 1 milyona çatdıra bildi. Falcon proqramı çərçivəsində isə SpaceX keçən il 60-dan çox uçuş missiyası reallaşdırdı.
