Windows 10-un məşhurluğu istifadəçilər arasında heç gözlənilmədən artıb
03.03.2023 /
Statcounter adlı analitik şirkət heç gözlənilmədən Windows 10 əməliyyat sisteminin məşhurluğunun istifadəçilər arasında artdığını müşahidə edib. Məlumatda qeyd edilib ki, keçən ay Windows 11-dən fərqli olaraq Windows 10-u 4 dəfə daha çox istifadəçi öz cihazlarına quraşdırıb. Mütəxəssislər bu vəziyyəti analiz edərək istifadəçilərin Windows 10-a bəslədikləri böyük marağın səbəbini açıqlayıblar. Məlumata əsasən keçən ay Windows 11-in bazardakı payı 1.01% yüksələrək 19.13%-ə çatıb. Bununla belə WIndows 10-nun bazardakı payı 4.39% yüksəlib.
Ümumi göstəricilərə gəldikdə isə yanvar ayındakı göstərici ilə müqayisədə fevral ayı üzrə Windows 10 əməliyyat sisteminə sahib kompüterlərin ümumi sayı 73.25% təşkil edib. Yanvar ayında bu göstərici 68.86% idi. Mütəxəssislərin fikirlərinə əsasən bunun səbəbi Microsoft şirkətinin yanvar ayında Windows 7 və Windows 8.1-in dəstəyini tamamilə dayandırmasındadır. Bu əməliyyat sistemlərinin istifadəçilər arasında məşhurluqlarının necə düşdüklərini qrafikdə görmək olar. Belə ki, Windows 7-nin bazar payı 9.55%-dən 5.39%-ə, Windows 8.1-in bazar payı isə 2.28%-dən 1.15%-ə düşüb. Windows 11-in istifadəçilər arasında ləng şəkildə yayılmasını isə mütəxəssislər onun sistem tələbləri ilə əlaqələndirirlər.
