Meta şirkəti süni zəka əsaslı reklam alətlərini test etməyə başlayıb
15.05.2023 /
Meta şirkəti digərləri kimi aktiv şəkildə generativ süni zəka məhsulları üzərində çalışır. Şirkət elan edib ki, o, süni zəka əsaslı reklam alətlərinin testlərinə start verib. Məlumata əsasən şirkətin süni zəka əsaslı reklam alətləri reklam edilən məhsullar üçün fon təsvirləri və reklam elanları kimi kontentləri tərtib edə bilirlər. Şirkət öz növbəsində bəzi reklamçıları bu yeni imkanları test etmək üçün dəvət edəcək. Dəvət ediləcək reklamçılar isə Meta-nın süni zəka əsaslı reklam alətlərini AI Sandbox adlı test xarakterli platformada yoxlaya biləcəklər.
Meta təmsilçiləri bildiriblər ki, onlar öz yeni reklam alətlərini iyul ayında daha çox reklamçıya təqdim etməyi planlaşdırırlar. İl ərzində isə süni zəka əsaslı bəzi funksiyaların açıq şəkildə təqdim edilən reklam alətlərinə inteqrasiya edilməsi gözlənilir. Microsoft tərəfindən aktiv şəkildə dəstəklənən OpenAI şirkətinin ChatGPT çat-botu istifadəçilər arasında məşhurlaşandan sonra Meta da digər şirkətlər kimi generativ süni zəka sahəsinə istiqamətləndi və bu sahəyə investisiyalar yatırdı. Süni zəka əsaslı reklam alətləri Meta-nın generativ süni zəka sahəsində ilk məhsullarını təqdimetmə cəhdidir.
