Google şirkətinin süni zəka sahəsində fəaliyyət göstərən DeepMind adlı laboratoriyasının həmtəsisçisi Mustafa Suleyman CNBC-yə müsahibəsində bildirib ki, uzun müddətli perspektivdə süni zəka insan əməyini tamamilə əvəz edə bilər. Mustafa Suleyman öz müsahibəsini Davosda keçirilmiş Ümumdünya İqtisadi Forumunda verib. Bu tədbirdə ən çox müzakirə olunmuş mövzulardan biri də məhz süni zəka olub.

     

“Hesab edirəm ki, uzunmüddətli perspektivdə biz bu alətlərin necə inteqrasiya edilməsi mövzusunda yaxşıca düşünməliyik. Onları tamamilə bazarın ixtiyarına buraxsaq, həmin alətlər insan əməyini kökündən əvəz edəcəklər” - deyə Mustafa Suleyman qeyd edib. Mütəxəssislər bildiriblər ki, iş yerlərinin süni zəka vasitəsilə əvəzlənməsi prosesi artıq gedir. Belə ki, biz keçən il texnoloji və media sahələrində işçilərin kütləvi ixtisarının şahidi olduq. Google, Amazon və Salesforce kimi böyük İT şirkətlər bu il üçün də çoxlu sayda işçinin ixtisar olunacağını istisna etmirlər. İxtisar edilmiş işçilərin çox hissəsi isə süni zəka texnologiyası ilə əvəzlənir.