“THE qlobal reytinqinin metodologiyası” mövzusunda təlim keçirilib
04.03.2024 /Martın 1-də Elm və Ali Təhsil üzrə Dövlət Agentliyi və “Times Higher Education” (THE) beynəlxalq reytinq təşkilatı arasında əməkdaşlıq çərçivəsində “THE qlobal reytinqinin metodologiyası” mövzusunda təlim keçirilib.
Təlimin məqsədi sözügedən qlobal reytinqə daxil olan və növbəti illərdə daxil olmaq potensialına malik ali təhsil müəssisələrində beynəlxalq reytinqlər üzrə məsul əməkdaşların reytinqin metodologiyası haqqında təlimatlandırılmasıdır.
Təlimdə Elm və Ali Təhsil üzrə Dövlət Agentliyinin direktoru Ülkər Səttarova THE qlobal reytinqinin metodologiyasının öyrənilməsi baxımından təlimin rolunu xüsusi vurğulayıb. Həmçinin reytinq bazalarında iştirakın yekun məqsəd olmadığını, bununla belə ali təhsil müəssisələrinin beynəlxalq rəqabət qabiliyyətinin ölçülməsi üçün önəmli alət olduğunu qeyd edib.
THE beynəlxalq reytinq təşkilatının konsaltinq direktoru Mei Mei Lim sözügedən reytinqin metodologiyası, o cümlədən Azərbaycan ali təhsil müəssisələrinin nəticələri barədə təqdimatla çıxış edib və təlim iştirakçılarının suallarını cavablandırıb.
Sonda təlim iştirakçılarına sertifikatlar təqdim olunub və xatirə şəkli çəkdirilib.