Kosmik hava durumu və proqnozu açıqlanıb
04.03.2024 /
Kosmik hava durumu - Hesabat dövrü ərzində Günəşin fəallığı azalaraq, maksimal sinifli alışma 3571 oblastındakı M.18 sinifli alışma olmuşdur. Alışmalar nəticəsində II tip radioemissiya baş vermişdir. Hesabat dövrü ərzində bir neçə Tac Kütlə Atılmaları (TKA) qeydə alınmışdır. Günəşin səthində ləkələrin sayı azalaraq 8 ləkə qrupunda 91 ləkə müşahidə olunur. Yerə təsir göstərəcək Tac Dəlikləri qeydə alınmır.
Elm və Təhsil Nazirliyinin Şamaxı Astrofizika Rəsədxanasından verilən məlumata görə, enerjisi 2 MeV-dən çox olan elektron seli normal və orta, 10 MeV-dən çox enerji yüklü proton seli isə fon səviyyəsində olmuşdur.
Hesabat dövründə Günəş küləyinin maksimal sürəti 578 km/san-dək artmışdır. Yer orbitində planetlərarası maqnit sahəsinin maksimal qiyməti 19 nT, radial istiqamətdə isə -17 nT olmuşdur. Hal-hazırda Günəş küləyinin sürəti normaldır (375 km/san), planetlərarası maqnit sahəsinin maksimal qiyməti Yer orbitində 12 nT, radial istiqamətdə isə 6 nT təşkil edir.
Hesabat dövründə 27 fevralda proqnozlaşdırıldığı kimi geomaqnit sahəsinin intensivliyi qısa müddətli G1 səviyyəsinə yüksəlmişdir. 03 martda isə 28 fevralda baş vermiş TKA-nın təsiri ilə geomaqnit qasırğası başlamış və G2 (orta) səviyyəsinədək yüksəlmişdir. Hal-hazırda Kp indeksi 4-ə bərabərdir.
Kosmik hava proqnozu – Proqnoz günlərində (04-10 mart) C sinif alışmanın baş verməsi ehtimalı 85%, M (R1-R2) sinif alışmanın baş verməsi ehtimalı 25%, X (R3) sinif alışmanın baş verməsi ehtimalı isə 1% təşkil edir.
Enerjisi 2 MeV-dən çox olan elektron selinin normal və orta səviyyədə olacağı, 10 MeV-dən çox enerji yüklü proton selinin isə fon səviyyəsində qalacağı gözlənilir.
Günəş küləyinin sürətinin TKA-nın təsiri ilə bu gün artacağı, daha sonra normal olacağı gözlənilir.
Geomaqnit sahəsinin 5 martda sakitləşəcəyi, sonra isə sakit olacağı proqnozlaşdırılır.
