Gələn ilin oktyabr ayından başlayaraq Windows 10 əməliyyat sistemi artıq təhlükəsizlik yenilənmələrini əldə etməyəcək. Lakin Microsoft əlavə dəstək (ESU) proqramına sahibdir. Bu proqram istifadəçilərə əməliyyat sisteminin dəstək müddətinin yekunlaşmasından sonra əlavə yenilənmələrin yüklənməsi imkanını verir. İndi isə Microsoft bu proqramdan istifadə etmək istəyəcək şəxslər üçün bunun hansı qiymətə başa gələcəyini açıqlayıb.

     

Qeyd etmək lazımdır ki, sözügedən proqram Microsoft-un korporativ müştəriləri üçün nəzərdə tutulub və ondan illik bir kompüter üçün istifadə haqqı 61$ təşkil edəcək. Bu proqramın işə salınmasından müəyyən müddət sonra ona qoşulmaq istəyən şəxslər daha öncəki müddətlər üçün də ödənişləri etməli olacaqlar. Belə ki, proqrama qoşulacaq şəxsin kompüteri daha öncə istifadəyə verilmiş yenilənmələri də əldə edəcək. Windows 10-un əlavə dəstək müddəti 3 il ərzində davam edəcək. Nəticədə 2028-ci ildə hətta böyük şirkətlər belə məcbur şəkildə Windows 11-ə keçid etməli olacaqlar.