Kosmosun bilinən ən qədim və ən uzaq qalaktikası kəşf edilib!
03.06.2024 /
James Webb Kosmik Teleskopu, Böyük Partlayışdan cəmi 300 milyon il sonra yaranmış tarixin ən qədim və ən uzaq qalaktikasını aşkar edib.
Fəaliyyətə başladığı ilk gündən etibarən kosmosla bağlı təsirli araşdırmalar həyata keçirən James Webb Kosmik Teleskopu (JWST), yenidən əhəmiyyətli bir kəşfə imza atıb. Bu dəfə teleskop, məlum olan ən qədim və ən uzaq qalaktikaların təsvirlərini çəkə bilib. Alimlərin fikrincə, bu qalaktikalar Böyük Partlayışdan 300 milyon il sonra əmələ gəlib. Xüsusilə "JADES-GS-z14-0" və "JADES-GS-z14-1" adlı qalaktikalardan birincisi çox maraqlı bir xüsusiyyətə malikdir. Belə ki, hesablamalara əsasən, bu qalaktikanın eni 1600 işıq ili genişliyindədir və çox parlaq bir quruluşa malikdir. Mütəxəssislər, bu qalaktikanın gənc və aktiv ulduzlar ilə qidalandığını düşünürlər.
Alimlər bu kəşfi vacib hesab edirlər, çünki onların fikrincə, kainatın 300 milyon il kimi "qısa" bir müddətdə belə böyük qalaktika əmələ gətirməsi təəccüblüdür. Bundan əlavə, JADES-GS-z14-0, ölçüləri ilə qalaktikaların gözləniləndən daha sürətli böyüyə biləcəyi tezisini dəstəkləyir. Yeni kəşf, anlıq olara aparılmış bir araşdırmanın məhsulu deyil. Hubble Kosmik Teleskopu tərəfindən kəşf edilən bölgəni araşdıran JWST, güclü infraqırmızı cihazlarını 5 gün ərzində bu bölgədə cəmləşdirib. Bu tətqiqatlar nəticəsində isə JADES-GS-z14-0 və JADES-GS-z14-1 qalaktikaları kəşf edilib.
