Bakıda Xaricdə Yaşayan Azərbaycanlı Alimlərin Forumu keçirilir
11.09.2024 /
Bakıda Dünya Azərbaycanlı Alimlər Dərnəyinin təşkilatçılığı ilə Xaricdə Yaşayan Azərbaycanlı Alimlərin Forumu keçirilir. Forumda 23 ölkədən 80-dən çox azərbaycanlı alim olmaqla ümumilikdə 200-ə yaxın elm xadimi iştirak edir.
Forum dünyanın müxtəlif ölkələrində yaşayan azərbaycanlı alimləri bir araya gətirmək və onları yerli alimlərlə görüşdürmək, bilik və təcrübə mübadiləsi aparmaq və elm xadimlərinin şəbəkələşməsinə töhfə vermək məqsədilə təşkil olunub.
Forum çərçivəsində Azərbaycanda elm və ali təhsilin beynəlmiləlləşməsində alimlərin rolu və qlobal akademik şəbəkənin qurulması: yerli universitet və elmi tədqiqat institutlarının inkişafı üçün yeni yanaşmalar mövzuları üzrə plenar iclaslar keçiriləcək.
Sentyabrın 11-dək davam edəcək forumda iştirakçılar məruzələrlə çıxış edəcək, müxtəlif mövzular üzrə təşkil olunmuş sessiyalarda iştirak edəcək və Qarabağa səfər edəcəklər.
Qeyd edək ki, forum Diasporla İş üzrə Dövlət Komitəsinin, Elm və Təhsil Nazirliyinin və Elm və Ali Təhsil üzrə Dövlət Agentliyinin dəstəyi ilə keçirilir.
