NASA insanlı Ay missiyası üçün eniş zonalarını müəyyənləşdirib!

+A -A

NASA insanlı Ay missiyası üçün eniş zonalarını müəyyənləşdirib!

30.10.2024 /

NASA, 50 ildən artıq müddətdən sonra ilk ekipajlı Ay enişinə hazırlaşarkən, Artemis III (Artemida 3) vəzifəsi üçün Ayın cənub qütbü yaxınlığında 9 potensial eniş bölgəsini müəyyən edib.
NASA, yarım əsrdən artıq bir fasilədən sonra insanları Ay səfərinə göndərməyə hazırlaşır və Artemis III vəzifəsi üçün Ayın cənub qütbü yaxınlığında 9 mümkün eniş bölgəsini seçib. Bu bölgələr elmi və mühəndislik araşdırmaları ilə daha yaxından incələnəcək. NASA, Artemis 3-dən sonra da digər vəzifələr üçün eniş zonalarını qiymətləndirməyə davam edəcəyini bildirib.

NASA rəhbəri Lakiesha Hawkins, "Artemis insanlığı yenidən Aya aparacaq və kəşf edilməmiş bölgələri ziyarət edəcək. NASA-nın bu bölgələri seçməsi, ekipajın yeni elmi kəşfləri ortaya çıxarmalarına və Ay səthində yaşamağı öyrənmələrinə kömək etmək üçün cənub qütbü yaxınlığında təhlükəsiz eniş etmə mövzusunda qətiyyətimizi göstərir" deyib. Bu məqsədlə NASA, elmi və sənaye tərəfdaşları ilə sıx əməkdaşlıq edərək, elmi dəyər və vəzifə uyğunluğu baxımından qiymətləndirilmiş potensial eniş bölgələrini müəyyən edib.

Bu bölgələr, geoloji baxımdan müxtəliflik göstərir və vəzifələrin çevik şəkildə planlaşdırılmasına imkan verir. Ayın cənub qütbü daimi kölgəli sahələrə malikdir və su kimi resursları saxlamaq potensialına sahibdir. Onu da qeyd edək ki, bu sahələrə daha əvvəl insanlı bir missiya ilə gedilməyib. NASA-nın Artemis Ay elmi rəhbəri Sarah Noble, "Ayın cənub qütbü, Apollo missiyalarında səfər etdiyimiz yerlərdən tamamilə fərqli bir mühitə malikdir. Ayın ən qədim bölgələrinə, kölgəli sahələrinə və su kimi maddələrə giriş imkanı yaradır. Bu bölgələrdən hər hansı biri bizə möhtəşəm elmi araşdırmalar aparmaq və yeni kəşflər etmək imkanı verə bilər" deyib.

Eniş bölgələrinin müəyyən edilməsində NASA-nın Lunar Reconnaissance Orbiter məlumatları və geniş Ay araşdırmalarından istifadə edilib. Elmi potensial, buraxılış pəncərəsi uyğunluğu, ərazi əlverişliliyi, Yer ilə rabitə imkanı və işıqlanma şəraiti kimi bir çox faktor nəzərə alınıb. Bundan əlavə, NASA-nın SLS (Space Launch System) raketi, Orion kosmik gəmisi və SpaceX-in Starship HLS-nin (Human Landing System) təhlükəsiz eniş təmin edə bilməsi üçün lazım olan orbit xüsusiyyətləri də diqqətə alınıb.

NASA, insanlı Artemis 2 missiyasını ən erkən 2025-ci ilin sentyabrında həyata keçirməyi planlaşdırır. Bu missiyada 4 nəfərlik ekipaj iştirak edəcək. SLS raketi ilə buraxılacaq astronavtlar Orion kosmik gəmisi ilə Ayın ətrafında bir dövrə vuracaqlar. Bu missiya əsasən bir sınaq olacaq. 2026-cı ilin sentyabr ayı üçün planlaşdırılan Artemis 3 missiyasında isə 2 astronavt Ay orbitində qalacaq, 2 astronavt isə səthə eniş edəcək. Bu missiya 30 gün davam edəcək, Ay səthində keçiriləcək müddət isə təxminən 1 həftə olacaq.

technote.az