Alimlər süni intellektdən istifadə edərək qoxuları "teleportasiya" etməyi bacarıblar!
01.11.2024 /
Keçmiş bir Google mühəndisi tərəfindən qurulan süni intellekt startapı Osmo, qoxunu rəqəmsallaşdıraraq başqa yerə ötürməyi bacarıb.
Keçmişdə Google-ın süni intellekt layihələrinə rəhbərlik edən və 2022-ci ildə öz süni intellekt startapı Osmo-nu quran Alex Wiltschko və komandası diqqətçəkən bir işə imza atıb. Mühəndislərdən ibarət olan komanda, qoxunu rəqəmsal hala gətirib, başqa yerdə yenidən yaratmağı bacarıb. Qoxunun rəqəmsallaşdırılması və başqa yerə ötürülməsi elm adamlarının uzun müddətdir üzərində işlədikləri mövzulardan biri idi. Məhz Osmo bu məqsədə çatmaq üçün süni intellektdən istifadə edib və açıqlamalara əsasən uğur əldə olunub.
Osmo komandasının layihəsi hər hansı bir əşyanın qoxusunu süni intellektin dəstəyi ilə rəqəmsallaşdırır. Aparılan molekulyar təhlillər, ikinci mərhələdə isə sintez üçün istifadə olunur. Üstəlik, bu prosesdə insan müdaxiləsinə ehtiyac olmur. Bütün bu işlərin nəticəsində laboratoriyada alınan qoxu başqa bir yerdə sintez edilmiş olur. Komanda bu işi "qoxunun teleportasiyası" kimi xarakterizə edir.
Osmo, bu ilin əvvəlində elan etdiyi layihəni hər ay bir az daha irəliyə aparmağa davam etdiyini bildirir. Açıqlamaya görə, komanda hazırladığı sistemi hər ay daha da sürətləndirir, avtomatlaşdırır və hətta daha mürəkkəb qoxular sintez etmək üçün üzərində işləyir. Görək, aparılan işlər sonda bizləri hansı nəticəyə gətirib, çıxaracaq.
