Alimlər təqribi olaraq 10.7 milyon il bundan öncə asteroid ilə toqquşma nəticəsində Mars səthindən kosmosa atılmış Lafayet adlı meteoriti analiz edərək Marsın keçmişi barəsində yeni təfərrüatları əldə ediblər. Müasir analiz üsullarından istifadə edərək mütəxəssislər təyin ediblər ki, təqribi olaraq 742 milyon il bundan öncə Mars süxurları maye şəklində su ilə əlaqədə olublar. Qeyd etmək lazımdır ki, Lafayet adlı meteorit Mars ilə əlaqəli olan nadir meteoritlərdən biridir. O, 1.3-1.4 milyard il bundan öncə formalaşmış vulkanik süxurlar sinifinə daxildir. Lafayet-in tərkibindəki izotopların unikal nisbətləri onun Mars mənşəli olduğunu təsdiqləyiblər.

     

Lafayet ilə bağlı olan maraqlı bir fakt ondan ibarətdir ki, o, 1931-ci ildə Perdyu Universitetinin kolleksiyaları arasında tapılmışdı. Meteoritin hansı şərtlər altında universitet kolleksiyaları arasına düşdüyü indiyənə kimi bilinmir. Lafayet-in su ilə qarşılıqlı əlaqədə olması daha öncə də aydın idi. Lakin bu qarşılıqlı əlaqənin nə zaman baş verdiyini dəqiq şəkildə yalnız indi təyin etmək mümkün olub. Bu vacib kəşf alimlərin Mars barəsindəki təsvirlərini tamamlayır. Görünür, Mars səthində su öncə düşünüldüyündən daha gec zamanda mövcud olub. Mars ilə əlaqəli olan meteoritlər onun geoloji tarixçəsini müşahidə etməyə imkan verirlər. Lafayet-in tədqiqatı öz növbəsində Marsın iqlim dəyişiklikləri və təkamülünü daha dərindən anlamağa yardımçı olur.