ChatGPT-nin gündəlik aktiv istifadəçi kütləsi 300 milyona çatıb
06.12.2024 /
Süni zəka sahəsindəki böyük rəqabətə baxmayaraq OpenAI şirkətinin süni zəka əsaslı çat-botu olan ChatGPT-nin istifadəçi kütləsi sürətlə böyüməyə davam edir. Qeyd etmək lazımdır ki, bu ilin avqust ayında OpenAI şirkəti elan etmişdi ki, çat-botun gündəlik istifadəçi kütləsi 200 milyona çatıb. İndi isə məlum olub ki, çat-botun istifadəçi kütləsinə əlavə 100 milyon istifadəçi qoşulub. Maraqlısı ondadır ki, çat-bot 100 milyon yeni istifadəçini özünə cəmi 3 ay ərzində cəlb edə bilib. ChatGPT-nin bu yeni nailiyyəti barəsində şirkətin CEO-su Sam Altman xəbər verib.
“Bizim layihəmiz miqyaslanıb. Bizim artıq gündəlik 300 milyon aktiv istifadəçi kütləmiz var” - deyə Altman qeyd edib. Altman həmçinin qeyd edib ki, gün ərzində istifadəçilər ChatGPT-yə 1 milyondan çox mesaj göndərirlər. ChatGPT-nin istifadəçi kütləsi çat-botun 2022-ci ilin noyabr ayında istifadəyə verildiyi zamandan sürətlə artmaqda davam edir. OpenAI isə öz növbəsində çat-bota istifadəçilərin maraqlarını cəlb edən yeni imkanlar əlavə edir. Bununla yanaşı Apple şirkəti sözügedən çat-botu iOS 18.2 əməliyyat sistemi çərçivəsində Siri səsli köməkçisinə inteqrasiya edib. Bu isə öz növbəsində çat-bota daha çox istifadəçi kütləsini əhatə etməyə imkan verir.
