Çinin Experimental Advanced Superconducting Tokamak (EAST) adlı termonüvə reaktoru yeni rekorda imza atıb. Belə ki, Çin Elmlər Akademiyasının vermiş olduğu məlumata əsasən sözügedən termonüvə reaktoru 100 milyon dərəcə Selsi temperaturlu plazmanı 1006 saniyə ərzində stabil vəziyyətdə saxlaya bilib. Bu, daha əvvəl əldə edilmiş nəticələrdən 2 dəfə yüksəkdir. Qeyd etmək lazımdır ki, daha öncəki rekord da bu termonüvə reaktoru vasitəsilə 2023-cü ildə qırılmışdı. Həmin vaxtda reaktor plazmanı 403 saniyə ərzində stabil şəkildə saxlaya bilmişdi. 1000 saniyəlik sərhədin keçilməsi öz növbəsində termonüvə sintezi araşdırmalarında kritik faktor hesab edilir.

     

Yüksək temperaturlu plazmanın bu qədər uzun müddət ərzində stabil şəkildə saxlanması termonüvə reaktorların praktik istifadəsi imkanının təsdiqlənməsi üçün vacib göstəricidir. “Termonüvə sintezi reaksiyalarının özlərini dəstəkləmələri üçün onlar 1000 saniyəlik göstəriciyə çatmalıdırlar. Bu yeni rekord təcrübi qurğu çərçivəsində termonüvə reaktorlarının çalışmaları üçün lazım olan şərtlərin formalaşdırılması üzrə ilk haldır” - deyə mütəxəssislərdən biri qeyd edib. Qeyd etmək lazımdır ki, termonüvə sintezi sahəsində aparılan araşdırmaların əsas məqsədi “sonsuz” enerji mənbəyinin əldə edilməsidir. Bu cür enerji mənbəyi dünyanın enerji ilə bağlı bütün tələblərini qarşılaya bilər.