Son aylarda DeepSeek öz inkişafında əhəmiyyətli bir sıçrayış edib və ikincidərəcəli layihə statusundan çıxaraq, öz qabaqcıl böyük dil modellərini (Large Language Model / LLM) modellərini təqdim etməklə qlobal süni zəka sənayesində ciddi rəqib ola biləcək bir şirkətə çevrilib. Şirkət OpenAI-nin GPT-4 modelinə rəqabət yaratmaqla yanaşı, eyni zamanda bəzi məlumatlara görə, bunu məhdud hesablama resursları ilə həyata keçirib. Məlumata əsasən, DeepSeek artıq öz süni zəka çiplərini hazırlamaq imkanını nəzərdən keçirir və bu sahədə irəliləyən digər aparıcı oyunçulara qoşulmağa hazırlaşır.

Hesabatda DeepSeek-in çip istehsalı sahəsindəki layihələri ilə bağlı konkret məlumat azdır, lakin qeyd olunur ki, şirkət "genişmiqyaslı işə qəbul kampaniyası" başladıb və bu layihəyə rəhbərlik etmək üçün yarımkeçiricilər sahəsindəki mütəxəssisləri cəlb edir. Lakin süni zəka çiplərinin hazırlanması mürəkkəb bir prosesdir və sabit təchizat zənciri tələb edir. Çin şirkətləri, o cümlədən DeepSeek, qlobal sanksiyalar səbəbindən qabaqcıl yarımkeçirici texnologiyalara çıxışda çətinliklərlə üzləşirlər. Hazırda yeganə əlçatan mənbə SMIC şirkətidir, lakin bu şirkət hələ də qlobal yarımkeçirici sənayesinin liderlərindən geri qalır.

Buna baxmayaraq, ABŞ-ın ticarət məhdudiyyətləri DeepSeek-in irəliləməsinə mane olmur. Şirkət rəqibləri ilə müqayisə edilə bilən avadanlıqlara sahibdir və hələ açıqlanmayan daha geniş resurslara malik ola bilər. Bundan əlavə, şirkət məlumat emalı ilə bağlı tapşırıqları yerinə yetirmək üçün Huawei Ascend AI çiplərindən istifadə edir. DeepSeek-in öz çiplərini hazırlamaq ideyası, şübhəsiz ki, suallar doğurur, xüsusilə də şirkətin hələ OpenAI kimi iri investisiyalara malik olmaması nəzərə alındıqda. Buna baxmayaraq, DeepSeek bu imkanları araşdırır, bu da süni zəka bazarında rəqabətin və müxtəlifliyin artmasına töhfə verə bilər. Əsas məsələ isə odur ki, şirkət bu inkişafı praktiki tətbiq mərhələsinə qədər çatdıra biləcəkmi?