İdarəetmə Sistemləri İnstitutunun Elm gününə həsr olunmuş elmi seminarı keçirilib
18.03.2021 / Xəbərlər
AMEA İdarəetmə Sistemləri İnstitutunun (İSİ) Elm gününə həsr olunmuş elmi seminarı keçirilib. Tədbirdə İnstitutun rəhbərliyi, alim və mütəxəssislər, o cümlədən institutun gənc tədqiqatçıları iştirak ediblər.
Seminarı institutun baş direktoru, akademik Əli Abbasov açaraq qeyd edib ki, ölkə başçısının sərəncamı ilə Elm gününün təsis olunması AMEA-nın yaradıldığı günlə bağlı olaraq xüsusi əhəmiyyətə malikdir. Alim bu əlamətdar günün önəmini vurğulayaraq mart ayı ərzində İSİ-də Elm günü əlaqədar bir sıra tədbirlərin keçirildiyini bildirib.
Sonra AMEA-nın müxbir üzvü, iqtisad elmləri doktoru, professor Qorxmaz İmanov “Ölkənin sosial-iqtisadi inkişafının səviyyəsinin qiymətləndirilməsi modelləri” adlı məruzə ilə çıxış edərək əvvəlcə dünyada sosial-iqtisadi inkişafın səviyyəsinin qiymətləndirilməsi üçün istifadə olunan modellərdən ətraflı məlumat vermişdir. Sonra o, makroiqtisadi dayanıqlığı qiymətlndirmək üçün Beynəlxalq Valyuta Fondu tərəfindən təklif olunan göstəricilər nəzərə alınmaqla aparılmış hesablamaların nəticələrini tədqim etmişdir.
Daha sonra alim ölkənin sosial-iqtisadi inkişaf səviyyəsini təyin etmək məqsədilə BMT-nin Bazel İcmalar və İqtisadiyyat İnstitutu tərəfindən təklif olunan sosial kapital göstəricilərinə əlavələr edərək makroiqtisadi səviyyə indekslərinin qiymətləndirildiyini və hesablama prosesində intuitiv qeyri-səlis linqivistik çoxluqlardan istifadə edildiyini seminar iştirakçıların diqqətinə çatdırıb. Bu göstəricilərin sırasında insan kapitalı və elmi tədqiqatlar, iş təcrübəsi, bilik, texnoloji nailiyyətlər və s. alt indekslər də yer almışdır.
Q.İmanov nəticə olaraq qeyd edib ki, sadalanan göstəricilər dördüncü sənaye inqilabının baş verdiyi müasir şəraitdə ölkənin sosial-iqtisadi inkişaf səviyyəsini elmi nöqteyi-nəzərdən daha dəqiq qiymətləndirildirməyə imkan verir. O, diqqətə çatdırıb ki, təklif olunan yanaşma modeli qərar qəbul edən şəxslərə inkişaf səviyyəsinin keyfiyyətinin optimal parametrlərini qiymətləndirməyə imkan verir.
Sonra məruzəçi iştirakçıların suallarını cavablandırmış, mövzu ətrafında müzakirələr aparılmış və müvafiq qərar qəbul edilmişdir.
