İdarəetmə Sistemləri İnstitutunda "Elm Günü"nə həsr olunmuş vebinar keçirilib
19.03.2021 / XəbərlərAMEA İdarəetmə Sistemləri İnstitutunda (İSİ) "Elm Günü"nə həsr olunmuş Avropa Birliyinin Elmi-Tədqiqat və İnnovasiya Çərçivə Proqramlarının “Mariya Skłodovskaya-Küri tədbirləri – karyera inkişafı” (MSCA) mövzusunda vebinarı keçirilib. Tədbirdə İnstitutun rəhbərliyi, alim və mütəxəssislər, gənc tədqiqatçılar və dəvət olunmuş qonaqlar iştirak ediblər. Tədbir İSİ Xarici əlaqələr və innovasiya şöbəsinin müdiri, “Horizon 2020” Proqramının Avropa MSCA üzrə milli əlaqələndirici şəxsi, t.ü.f.d.Tofiq Babayevin moderatorluğu ilə baş tutub.
Vebinarı İSİ-nin icraçı direktoru, AMEA- nın müxbir üzvü Əminağa Sadıqov açaraq Elm Gününün əhəmiyyətini vurğulayıb və bu əlamətdar günə həsr olunan tədbirin önəmini qeyd edib. O bildirib ki, Azərbaycanın Avropaya inteqrasiyası istiqamətində elmi fəaliyyət əlaqələrinin genişləndirilməsi baxımından MSCA proqramı böyük əhəmiyyətə malikdir və tədqiqatçıların bu proqrama cəlb olunması, həmçinin fürsətlərdən maksimum yararlanması onların karyera inkişafı üçün faydalıdır. Ə.Sadıqov Azərbaycan elminin dünya elminə inteqrasiyası, beynəlxalq əlaqələrin genişləndirilməsi və rəqabət qabiliyyətinin artırılması ilə bağlı ölkə başçısının sərəncamlarını xüsusilə qeyd etmişdir.
Sonra Tofiq Babayev tədbir iştirakçılarına MSCA proqramına qoşulmağın üstünlükləri barədə məlumat verərək bildirib ki, bu proqram transmilli, sahələrarası və fənlərarası hərəkətliliyi təşviq edir, elmi - tədqiqat mərkəzli təşkilatların istedadlı xarici tədqiqatçılara ev sahibliyi etməsinə və dünyanın aparıcı qurumları ilə strateji tərəfdaşlıq yaratmasına imkan yaradır.
Daha sonra Arxeologiya və Etnoqrafiya İnstitutunun şöbə müdiri, “Horizon 2020” Proqramının Avropa MSCA üzrə milli əlaqələndirici şəxsi, t.ü.f.d. Zaur Həsənov MSCA proqramına həsr edilən təqdimatla çıxış edib. Məruzəçi proqramın strukturu, imkanları və əldə olunan uğurlar barədə tədbir iştirakçılarına məlumat verib. O, tanınmış alim Marie Curienin şərəfinə adlanan bu proqramın məqsədinin indi və gələcəkdə ola biləcək problemləri həll etməyə hazır, yüksək səviyyəli elmi yenilikləri olan tədqiqatçıların təlimi və onlar üçün bilik mübadiləsinə imkanlar yaratmaq olduğunu bildirmişdir. Z.Həsənov Avropa alimlərinin elmin inteqrasiyası baxımından bu proqramın inkişafına maraqlı olduqlarını qeyd edərək MSCA proqramının əsas hədəfinin kreativ, sahibkaryönümlü və innovativ tədqiqatçıların yeni nəslinin hazırlanılması və tədqiqatların keyfiyyətinin artırılması olduğunu vurğulamışdır.
Sonra məruzəçi iştirakçıların suallarını cavablandırmış, mövzu ətrafında müzakirələr aparılmışdır.
Tədbirin sonunda Ə.Sadıqov iştirakçıları qarşıdan gələn Novruz bayramı və Elm Günü münasibətilə təbrik edərək gələcək fəaliyyətlərində müvəffəqiyyət arzulayıb.