AMEA YT Parkın rezidenti ilə İdarəetmə Sistemləri İnstitutu arasında əməkdaşlıq perspektivləri müzakirə olunub
27.04.2021 / Xəbərlər
AMEA İdarəetmə Sistemləri İnstitutunun (İSİ) icraçı direktoru, AMEA-nın müxbir üzvü Əminağa Sadıqov və AMEA Yüksək Texnologiyalar Parkının (YT Park) rezidenti olan “Elm və Texnologiya Parkı” Məhdud Məsuliyyətli Cəmiyyətinin (MMC) direktoru Zahir Nəsibov arasında görüş keçirilib.
Görüşün keçirilməsində məqsəd iki qurum arasında bir sıra elmi-texnoloji layihələrin yerinə yetirilməsinin müzakirəsi olub.
Əvvəlcə çıxış edən AMEA-nın müxbir üzvü Ə.Sadıqov Azərbaycan elminin dünyada baş verən elmi-texnoloji proseslərdə aparıcı mövqe tutması üçün ölkəmizdə mühüm addımların atıldığını qeyd edib. O, bu prosesə AMEA tərəfindən böyük dəstək göstərildiyini, innovasiyayönümlü elmi tədqiqat işlərinin nəticələrinin yüksək texnoloji məhsulların istehsalında tətbiqinə xüsusi əhəmiyyət verildiyini vurğulayıb.
“Elm və Texnologiya Parkı” MMC-nin direktoru Z.Nəsibov rəhbərlik etdiyi qurumun rezidenti olduğu YT Parkda müasir elmi və texnoloji nailiyyətlərə əsaslanan innovasiya və yüksək texnologiya məhsullarının istehsalı, biliklərin kommersiyalaşdırılması istiqamətində onlara göstərilən dəstəkdən danışıb. Direktor elmin kommersiyalaşdırılması məqsədilə hər bir rezidentə böyük güzəştlər və üstünlüklər təklif edildiyini diqqətə çatdırıb.
Bildirib ki, bu güzəştlərdən yararlanan “Elm və Texnologiya Parkı” MMC tərəfindən İSİ-nin elmi dəstəyi ilə dron texnologiyalarının hazırlanması ilə bağlı innovativ layihənin icrası planlaşdırılır.
Sonda birgə yeni layihələrin yerinə yetirilməsi ilə bağlı fikir mübadiləsi aparılıb, suallar cavablandırılıb.
Qeyd edək ki, görüşdə İSİ-nin Kəsilməz proseslərin modelləşdirilməsi və idarə edilməsi laboratoriyasının müdiri, riyaziyyat üzrə fəlsəfə doktoru, dosent Ədalət Paşayev və “Elm və Texnologiya Parkı” MMC-nin baş mütəxəssisi Nadir Babaxanov da iştirak ediblər.
