Bakı Ali Neft Məktəbində Ümummilli lider Heydər Əliyevin anadan olmasının 98-ci ildönümünə həsr olunmuş Beynəlxalq Elmi Konfransının açılış mərasimi keçirilib
29.04.2021 / XəbərlərBakı Ali Neft Məktəbinin (BANM) təşkilatçılığı ilə Ümummilli lider Heydər Əliyevin anadan olmasının 98-ci ildönümünə həsr olunmuş Tələbə və Gənc Tədqiqatçıların II Beynəlxalq Elmi Konfransının açılış mərasimi keçirilib.
Konfransın açılış mərasimində Bakı Ali Neft Məktəbinin rektoru Elmar Qasımov, AMEA-nın vitse-prezidenti, Molekulyar Biologiya və Biotexnologiyalar İnstitutunun direktoru, AMEA-nın həqiqi üzvü, akademik İradə Hüseynova, “Baker Hughes” şirkətinin Rusiya və Xəzər regionunda neft yataqları xidmətləri üzrə vitse-prezidenti Tommy Kassem, “Kinetics Technology” şirkətinin Azərbaycandakı nümayəndəliyinin rəhbəri Niccolo Heilpern, BP şirkətinin baş geoloqu Arzu Cavadova, “SOCAR Polymer” MMC-nin İctimaiyyətlə Əlaqələr üzrə mütəxəssisi, BANM-in məzunu Bəxtiyar Allahverdiyev, “Halliburton” şirkətinin vitse-prezidenti Kolton Tomas çıxış edib.
Tədbirdə AMEA İdarəetmə Sistemləri İnstitutunun baş direktoru akademik Əli Abbasov da iştirak edib. Ümumilikdə, onlayn tədbirə 1000-ə yaxın iştirakçı qoşulub.
Konfransı giriş sözü ilə açan Bakı Ali Neft Məktəbinin rektoru Elmar Qasımov iştirakçıları salamlayaraq bu konfransın ənənəvi olaraq hər il BANM-də keçirildiyini vurğulayıb. E.Qasımov bildirib ki, 9 illik müddəti əhatə edən konfransın keçirilməsinin əsas məqsədi tələbələrdə elmə, elmi tədqiqat işlərinə maraq yaratmaq və bu sahədə onlar arasında bilik və bacarıqların mübadiləsini təmin etməkdir.
SOCAR strukturuna daxil olan müəssisələrin rəhbərlərinin və media mənsublarının da qatıldığı konfrans öz işini ayrı-ayrı bölmələr üzrə 13-28 aprel tarixləri arasında davam etdirib.
Tezislər Azərbaycan Dövlət Neft və Sənaye Universiteti, Azərbaycan Dövlət İqtisad Universiteti, Bakı Dövlət Universiteti, Azərbaycan Memarlıq və İnşaat Universiteti, Azərbaycan Tibb Universiteti, Gəncə Dövlət Universiteti, Naxçıvan Dövlət Universiteti və Azərbaycan Fransız Universitetinin, AMEA-ın Neft-Kimya Prosesləri, İnformasiya Texnologiyaları, Molekulyar Biologiya və Biotexnologiyalar, Polimer Materialları, Geologiya və Geofizika, Kataliz və Qeyri-üzvi Kimya, İdarəetmə Sistemləri institutlarının, eləcə də digər təhsil müəssisələrinin tələbələ və tədqiqatçıları tərəfindən təqdim olunub.
Qeyd edək ki, İdarəetmə Sistemləri İnstitutunun gənc alimlərindən elmi işçi Puşnova Valeriya «Possibilities of organizing the Distributed Education Information System (DEIS) model», Nigar Alişzadə və Aytaç Mustafazadə dosent Gulchin Abdullayevanın rəhbərliyi ilə «Multi-agent approach in real-time decision-making systems», Rayihə Niyazova dosent Saqif Hüseynovun rəhbərliyi ilə «Verilənləri intervallar olan çanta məsələsinin bir innovativ həll üsulu» adlı məqalələrlə konfransda iştirak ediblər.