Azərbaycan Respublikasının Mərkəzi Bankı tərəfindən İdarəetmə Sistemləri İnstitutunda «Sığorta və onun mahiyyəti» mövzusunda seminar keçirilib

04.06.2021 / Xəbərlər

03 iyun 2021-ci il tarixində İdarəetmə Sistemləri İnstitutunda (İSİ) Azərbaycan Respublikasının Mərkəzi Bankı tərəfindən «Sığorta və onun mahiyyəti» mövzusunda maarifləndirici seminar keçirilib. Seminarda Azərbaycan Milli Elmlər Akademiyası İdarəetmə Sistemləri İnstitutunun və Azərbaycan Mərkəzi Bankının əməkdaşları iştirak ediblər. Ölkəmizdə pandemiya ilə əlaqədar tətbiq olunan xüsusi rejim nəzərə alınaraq seminar onlayn formatda Zoom platforması üzərindən həyata keçirilib.

Seminarda Azərbaycan Dəmir Yolları Təlim mərkəzinin direktoru, Azərbaycan Bank Tədris Mərkəzinin daxili audit və sığorta üzrə ekspert Pərviz Quliyev “Sığorta və onun mahiyyəti” mövzusunda təqdimatla çıxış edərək bildirib ki, insanla təbiət arasında və ictimai həyatda mövcud olan ziddiyyətlər bütövlükdə neqativ halların baş verməsinə şərait yaradır. Bu kimi halların nəticəsində də dünyada sığorta fəaliyyətinin yaranmasına və inkişaf etməsinə zəmin yaranır.

P. Quliyev qeyd edib ki, sığorta fiziki və ya hüquqi şəxsə dəymiş zərərin ödənilməsi üçün vasitədir və sığorta fondu tərəfindən həyata keçirilir. O, sığortanın mahiyyəti, sığorta ödənişləri və bu sahədə fəaliyyət göstərən qurumlar barədə ətraflı məlumat verərək bildirib ki, sığorta insanın gündəlik həyatında rastlaşdığı risklərdən müdafiə sistemidir.

O, həmçinin kənd və böyük şəhərlərdə sığortanın əhəmiyyəti, sığortanın funksiyaları, sinifləri, növləri və üstünlükləri barədə seminar iştirakçılarına ətraflı şəkildə faydalı məlumatlar verib. Mövzu ətrafında müzakirələr aparılıb və bir sıra suallar cavablandırılıb.

Qeyd edək ki, seminar 2-4 iyun 2021-ci il tarixlərində davam edəcək. Seminar barədə əlavə məlumatı isi.az saytının «Elanlar» bölməsindən əldə etmək olar.