Akademik Rasim Əliquliyev GEANT Assosiasiyasının Baş Assambleyasının 24-cü iclasında iştirak edib
23.06.2021 / Xəbərlər
AMEA-nın vitse-prezidenti, Fizika-Riyaziyyat və Texnika Elmləri Bölməsinin Elmi şurasının sədri, İnformasiya Texnologiyaları İnstitutunun direktoru, akademik Rasim Əliquliyev və adıçəkilən müəssisənin şöbə müdiri, texnika üzrə fəlsəfə doktoru Babək Nəbiyev 21-22 iyun 2021-ci il tarixlərində GEANT-ın Baş Assambleyasının 24-cü iclasında iştirak ediblər. Onlayn tədbirə Avropa, eləcə də Şərq Tərəfdaşlığı ölkələrinin Elm və Təhsil şəbəkələrindən nümayəndələr və layihə icraçıları qoşulub.
Tədbirdə GEANT Assosasiyasının 2020-ci il üzrə iştirakçılarının illik hesabatı təqdim edilib və 2021-2026-ci illər üzrə strategiya təsdiq olunub. Bundan əlavə, GEANT tərəfindən təqdim edilən xidmətlərdə son yeniliklər haqqında məlumat verilib.
Yığıncaqda, həmçinin COVID-19 pandemiyasının Elm və Təhsil Şəbəkələrinin iş fəaliyyətinə təsiri üzrə müzakirələr aparılıb. Gələcəkdə keçirilməsi nəzərdə tutulan konfranslar və görüşlər barədə ümumi məlumat verilib.
Qeyd edək ki, Baş Assambleya GEANT-ın ən yüksək idarəetmə orqanıdır. Üzv təşkilatların nümayəndələri ildə ən azı 2 dəfə görüşürlər.
