Azərbaycan Respublikasının Mərkəzi Bankı tərəfindən maarifləndirici seminar keçirilib
07.07.2021 / Xəbərlər06 iyul 2021-ci il tarixində AMEA İdarəetmə Sistemləri İnstitutunda (İSİ) Azərbaycan Respublikasının Mərkəzi Bankı tərəfindən "Milli pul nişanlarımız" mövzusunda maarifləndirici seminar keçirilib. Seminarda İdarəetmə Sistemləri İnstitutunun və Azərbaycan Mərkəzi Bankının əməkdaşları iştirak ediblər. Ölkəmizdə pandemiya ilə əlaqədar tətbiq olunan xüsusi rejim nəzərə alınaraq seminar onlayn formatda Zoom platforması üzərindən həyata keçirilib.
Seminarda Azərbaycan Mərkəzi Bankının nağd pul departamentinin əməkdaşı Aysel Məmmədova Azərbaycan Respublikasının pul vahidi haqqında ətraflı məlumat verərək yeni nəsil pul nişanlarının xarakteristikası, formaları barədə danışıb.
A. Məmmədova, həmçinin müasir dövrdə xüsusi önəm kəsb edən pul nişanlarının mühafizə sistemləri barədə tədbir iştirakçılarına məlumat verərək qeyd edib ki, kağız pul nişanlarının mühafizə sistemi beynəlxalq təcrübəyə uyğun olaraq 4 pilləli şəkildə hazırlanır. Bildirib ki, mühafizə elementləri xüsusi qruplar üzrə təsnif olunur və əhali tərəfinfən pulların həqiqiliyi xüsusi bilik və səriştə olmadan müəyyən oluna bilir.
Daha sonra Mərkəzi Bankın Nağd pul departamentinin Pul nişanlarının ekspertizası və saxtalaşdırılmasına qarşı mübarizə şöbəsinin rəisi Nəsib Pənahlısaxta saxta pullar bardədə məruzə ilə çıxış etdi. N. Pənahov pul nişanlarının saxtalaşdırılmasının həvəskar və profesional üsulları, saxta pulların təyin olunması mexanizmi və Mərkəzi Bankda ekspertiza potensialından bəhs edərək seminar iştirakçılarına ətraflı məlumat verdi.
N. Pənahov pul nişanlarının keyfiyyətinin yüksək səviyyədə saxlanılması və saxtakarlığın qarşısının alınması məqsədilə Mərkəzi Bank tərəfindən həyata keçirilən təmiz pul siyasəti, çoxsaylı maarifləndirmə tədbirləri, daxili koordinasiya və beynəlxalq əməkdaşlıq haqqında danışdı, bu istiqamətdə faydalı resursları diqqətə çatdırdı.
Sonra məruzəçilər tədbir iştirakçılarının suallarını cavablandırdı, mövzu ətrafında geniş müzakirələr aparıldı, rəy və təkliflər səsləndirildi.
Sonda İSİ-nin icraçı direktoru, AMEA-nın müxbir üzvü Əminağa Sadıqov İSİ-də Azərbaycan Respublikasının Mərkəzi Bankı tərəfindən keçirilən “Milli pul nişanlarımız” mövzusunda maarifləndirici seminarı yüksək qiymətləndirərək müasir dövrün tələblərinə uyğun olaraq əhalinin bu sahədə biliklərinin artırılmasının önəmini qeyd etdi. Ə. Sadıqov İSİ-nin müxtəlif dövlət qurumları ilə, o cümlədən Mərkəzi Bankla əməkdaşlıq çərçivəsində bir sıra eilmi-praktiki məsələlərin həllində yaxından iştirak etdiyini vurğuladı və Milli Bankın əməkdaşlarına seminarın təşkilinə görə minnətdarlığını bildirdi.