AMEA-nın İdarəetmə Sistemləri İnstitutunda I kurs magistrantların attestasiyası keçirilib

09.07.2021 / Xəbərlər

AMEA-nın İdarəetmə Sistemləri İnstitutunda “Kompüter elmləri” və “Proseslərin avtomatlaşdırılması mühəndisliyi” ixtisasları üzrə təhsil alan I kurs magistrantların attestasiyası keçirilib.

Attestasiya Komissiyasının iclası İdarəetmə Sistemləri İnstitutunun icraçı direktoru, AMEA-nın müxbir üzvü Əminağa Sadıqovun sədrliyi ilə keçirilimişdir. O, iclası açaraq AMEA-da magistratura pilləsinin yaranma tarixindən, əldə olunan uğurlardan və İnstitutda gənc elmi kadrların yetişdirilməsinə istiqamətlənən addımlardan söz açmışdır.

Daha sonra magistrantlar Komissiya üzvlərinə öz dissertasiya işlərinin mövzularına uyğun olaraq fərdi iş planlarında nəzərdə tutulan elmi-tədqiqat işlərinin yerinə yetirilməsinin gedişatı, konfranslarda iştirak, elmi işlərin dərc olunması haqqında məlumat veriblər və Komissiya üzvlərinin suallarını cavablandırıblar.

Komissiyanın üzvü, İnstitutun Təhsil şöbəsinin müdiri riyaziyyat üzrə fəlsəfə doktoru Sevinc Quliyeva Komissiya üzvlərini magistrantların qış və yay imtahan sessiyalarının nəticələri ilə tanış etmişdir.

Hər bir magistrantın gördüyü işlər ətrafında müzakirələr aparılmış, komissiya üzvlərinin çıxışları və tövsiyələri dinlənilmişdir.

Yekunda Attestasiya Komissiyası magistrantların II kursa keçirilməsi barədə qərar qəbul edib.