AMEA İdarəetmə Sistemləri İnstitutunun əməkdaşlarının məqaləsi nüfuzlu jurnalda dərc olunub

06.08.2021 / Xəbərlər

AMEA-nın müşaviri akademik Telman Əliyev,  "Stokastik proseslərin müəyyən edilməsi" laboratoriyasının müdiri, t.e.d., professor Nailə Musaeva və t.ü.f.d. Nərmin Rzayevanın həmmüəllifi olduqları “Küyqarışıq təsadüfi siqnalların ekvivalent normallaşdırılmış korrelyasiya matrislərinin formalaşdırılması alqoritmləri adlı məqalə «Cybernetics and Systems Analysis» nüfuzlu elmi jurnalda dərc olunub.
https://doi.org/10.1007/s10559-021-00391-5

Məqalədə göstərilir ki, idarə olunan obyektlərdəki siqnallar, adətən temperatur, təzyiq, vibrasiya və s. kimi fiziki kəmiyyətləri özündə əks etdirir. Buna görə də nəzarət, diaqnostika və identifikasiya məsələlərinin həlli üçün normallaşdırılmış korrelyasiya matrislərinin formalaşdırılması zərurəti yaranır. Məqalədə texniki obyektlərin küyqarışıq giriş-çıxış siqnallarının normallaşdırılmış korrelyasiya matrislərinin formalaşmasındakı çətinliklər analiz olunmuşdur. Küyün və faydalı siqnalın ekvivalent qiymətlərini təyin etmək üçün alqoritmlər təklif olunmuş və küyqarışıq təsadüfi proseslərin faydalı siqnallarının korrelyasiya matrislərinə ekvivalent olan normallaşdırılmış korrelyasiya matrislərinin formalaşdırılması üçün onların istifadə olunma ehtimalı göstərilmişdir. Belə ki, bu zaman normallaşdırılmış korrelyasiya matrislərinin formalaşdırılması proseduru xeyli asanlaşır və elementlərinin xətaları da əhəmiyyətli dərəcədə azalır.