İlk dəfə Marsın dərinliyində aparılan tədqiqatlar alimləri təəccübləndirib
12.08.2021 / Xəbərlər
Bu yaxınlarda NASA-nın InSight missiyası alimlərə Marsın dərinliklərinə baxmağa və başqa bir planetin içərisinin ilk xəritəsini yaratmağa imkan verdi.
The Wall Street Journalının qeyd etdiyi kimi, ilk araşdırmanın nəticələri mütəxəssisləri təəccübləndirdi: belə ki, qırmızı planetin qabığının bir neçə təbəqəyə və gözlənildiyindən daha incə quruluşa malik olması alimlərin diqqətindən yayınmayıb.
Xüsusilə cihazın yerləşdiyi yerdə birinci qatın qalınlığı cəmi 8 kilometr olduğu halda, ikinci qatının qalınlığı isə 20 kilometr idi. Alimlər hesab edirlər ki, sərhədi 39 kilometr dərinliyində olan Mars qabığının üçüncü qatı da ola bilər. Hesablamalar nəticəsində planetin üst qabığının qalınlığının orta hesabla 24 ilə 72 kilometr arasında dəyişdiyi qənaətinə gəlinib.
Kosmik tədqiqatlar nəticəsində Marsın yalnız bir qat mantiyaya malik olması aydınlaşdırılıb. Nüvənin radiusunun gözləniləndən daha çox olması (təxminən 1830 kilometr), eyni zamanda, planetin "ürəyi"nin qeyri-adi dərəcədə aşağı sıxlığa malikliyinə dəlalət edib.
Alimlər ümid edirlər ki, əldə edilən yeni məlumatlar Marsın təkamül tarixini öyrənməklə yanaşı, Yerin Günəş sistemindəki yerini daha mükəmməl tədqiq etməyə kömək edəcək.
Onu da qeyd edək ki, bundan bir qədər əvvəl Çinin Kosmos İdarəsi Marsdan bir video yayımlamışdı. Kadrlarda sonsuz sarımtıl-qəhvəyi səhra, Mars vadiləri və kiçik kraterlər göstərilirdi. Bu kadrlarda, həmçinin paraşütün enən aparatının açılma anını və planetin səthinin Mars Rover (kəşfiyyat gəmisi) ilə kəsişməsini görmək mümkündür.
Tərcümə etdi: Alidə Zeynalova
