Azərbaycan alimləri MDB ölkələri arasında tətbiqi riyaziyyat sahəsində liderliyi qoruyub saxlayırlar
30.08.2021 / Xəbərlər
Azərbaycan Milli Elmlər Akademiyasının alimləri artıq uzun illərdir ki, dünyada ən böyük elektron elmi-analitik məlumat bazası olan "Clarivate Analytics"lə əməkdaşlıq edirlər. Tərəflər arasında razılaşma 2016-cı ildə imzalanıb və hazırda AMEA-nın institut və təşkilatlarının alim və mütəxəssisləri "Web of Science"dən fəal şəkildə istifadə edirlər.
"Clarivate Analytics" mütəmadi olaraq əvvəlki dövr üçün yenilənmələrin siyahısı ilə illik hesabatları dərc edir. Həmçinin buraya elmi jurnalların dinamikası, impakt-faktoru və s.ilə bağlı məlumatlar daxildir.
Son bir neçə ildə bu siyahıya Azərbaycan Respublikası Nəqliyyat, Rabitə və Yüksək Texnologiyalar Nazirliyi, Bakı Dövlət Universitetinin (BDU) nəzdində olan Tətbiqi Riyaziyyat Elmi Tədqiqat İnstitutu və AMEA-nın təsisçiliyi ilə dərc edilən “Applied and Computational Mathematics” (Tətbiqi və Hesablama Riyaziyyatı) beynəlxalq jurnalı liderlik edir.
Jurnalın baş redaktorlarından biri - BDU-nun Tətbiqi Riyaziyyat Elmi-Tədqiqat İnstitutunun direktoru, AMEA-nın Rəyasət Heyətinin üzvü, akademik Fikrət Əliyev bu barədə "Kaspi" qəzetinə müsahibə verib.
Alimin sözlərinə görə, jurnal 2002-ci ildən nəşr olunan və "Clarivate Analytics"in genişləndirilmiş siyahısına daxil olan ilk və tək elmi nəşrdir: "Jurnalda tətbiqi və hesablama riyaziyyatının müxtəlif sahələri üzrə yüksəkixtisaslı, əsaslandırılmış elmi məqalələr dərc olunur.
F.Əliyev qeyd edib ki, “Applied and Computational Mathematics” on il öncə "Science Citation Index Expanded" siyahısına daxil olub və Azərbaycan elmi tarixində ilk dəfə olaraq "Thomson Reuters"in "Journal Citation Reports"unun illik hesabatına əsasən, 2010-cu ilində 0.663 impakt-faktor alıb.
Alim əlavə edib ki, jurnal 2020-ci ildə isə "Journal Citation Reports"un illik hesabatına əsasən, keyfiyyət göstəricisi - impakt-faktor 3.898 alıb. Nəşr tətbiqi riyaziyyat və yüksək texnologiyalar sahəsində 265 beynəlxalq jurnal arasında onuncu, keçmiş Sovet İttifaqının ölkələri arasında birincidir.
Məqalə ilə daha ətraflı buradan tanış olmaq mümkündür.
