AMEA-nın müxbir üzvü Ağasi Məlikov beynəlxalq konfransda çıxış edib
28.09.2021 / Xəbərlər
20-24 sentyabr 2021-ci il tarixlərində Moskva şəhərində Rusiya Elmlər Akademiyasının İdarəetmə Problemləri İnstitutunun, Rusiya Xalqlar Dostluğu Universitetinin və Tomsk Dövlət Universitetinin birgə təşkilatçılığı ilə XXIV Beynəlxalq “Paylanmış Kompüter və Kommunikasiya Şəbəkələri” konfransı keçirilmişdir.
AMEA-nın müxbir üzvü, İdarəetmə Sistemləri İnstitutunun laboratoriya rəhbəri Ağasi Məlikov “Ehtiyatları xarab ola bilən və təkrar sorğuları olan sistemlərin modellərinin öyrənilməsi üçün alqoritmik yanaşma” adlı məruzə ilə konfransda çıxış etmişdir. Konfransın təşkilat komitəsi həmmüəllifləri A.Məlikovun keçmiş doktorantı Məmməd Şahmalıyev və Macarıstanın Debresen universitetinin professoru Janos Sztrik olan məruzənin elmi əhəmiyyətini nəzərə alaraq onun genişləndirilmiş versiyasını Springer nəşriyyatı tərəfindən nəşr olunacaq konfrans materiallarına daxil etməyi qərara almışdır.
Qeyd edək ki, A.Məlikov son 5 ildə həmin konfransın Beynəlxalq Təşkilat Komitəsinin üzvü olaraq “Paylanmış Sistemlərin və Şəbəkələrin Modelləşdirilməsi” bölməsinin bir seksiyasına rəhbərlik etmişdir.
