İdarəetmə Sistemləri İnstitutunun I kurs magistrantları ilə onlayn formatda görüş keçirilmişdir

19.11.2021 / Xəbərlər

18 noyabr 2021-ci il tarixində İdarəetmə Sistemləri İnstitutunda (İSİ) I kurs magistrantlarla onlayn formatda görüş keçirilmişdir. Tədbirdə institutun rəhbərliyi, Təhsil və İctimaiyyətlə Əlaqələr şöbələrinin nümayəndələri, I kurs magistrantlar və elmi rəhbərləri iştirak etmişdirlər.

İclası İSİ-nin icraçı direktoru, AMEA-nın müxbir üzvü Əminağa Sadıqov açaraq yüksəksəviyəli kadr potensialının inkişaf etdirilməsi baxımından magistratura pilləsinin önəminə toxundu. AMEA-da magistratura pilləsinin yaranma tarixindən, təhsil prosesinin keyfiyyətindən, o cümlədən İSİ-də magistrantlara göstərilən yüksək diqqət və qayğıdan bəhs edən Ə.Sadıqov əldə edilən uğurları və statistik göstəriciləri gənclərin diqqətinə çatdırdı.

2021/2022-ci tədris ili üzrə İSİ-də I kursda 7 olmaqla, ümumilikdə 11 magistrantın təhsil aldığını qeyd edən institutun Təhsil şöbəsinin müdiri, r.ü.f.d. Sevinc Quliyeva magistrantlar, təyin edilən elmi rəhbərlər və dissertasiya mövzuları barədə tədbir iştirakçılarına ətraflı məlumat vermişdir.

Sonra cari ilin magistrantları və onların elmi rəhbərləri dissertasiya işləri, tədris prosesinin gedişatı ilə bağlı çıxış etmiş, mövzu ətrafında geniş müzakirələr aparılmış, tövsiyələr səsləndirilmişdir.

Daha sonra İSİ-nin baş direktoru, akademik Əli Abbasov institutda magistrantların təhsil almaları üçün yaradılmış şəraitdən bəhs etmiş, gənclərə elmi fəaliyyətləri ilə bağlı tövsiyələrini səsləndirmişdir. Elm yolunda irəliləməyin önəminə toxunan Ə.Abbasov magistrantlara daim fəal olmağı tövsiyə etmiş, gələcək fəaliyyətlərində uğurlar arzulamışdır.