İdarəetmə Sistemləri İnstitutunda “Sabahın alimləri” müsabiqəsinə hazırlaşan şagirdlərlə növbəti görüş keçirilmişdir

13.12.2021 / Xəbərlər

Məlum olduğu kimi, Təhsil Nazirliyinin təşəbbüsü ilə 2012-ci ildən etibarən Azərbaycanın ümumtəhsil müəssisələrinin IX-XI siniflərində təhsil alan şagirdləri üçün “Sabahın alimləri” Respublika Müsabiqəsi keçirilir. AMEA-nın elmi müəssisələri, o cümlədən İdarəetmə Sistemləri İnstitutu (İSİ) layihələrə elmi dəstək verirlər.

2022-ci ilin fevral ayında keçirilməsi nəzərdə tutulan növbəti layihədə iştirak edəcək 189-190 saylı tam orta məktəbin komandasına institutun laboratoriya rəhbəri, t.e.d., dosent Fəhrad Paşayev rəhbərlik edir. Layihəyə hazırlıq məqsədilə şagirdlər üçün AMEA-nın Yüksək Texnologiyalar Parkına (YT Park) ekskursiya təşkil edilmiş, daha sonra institutda məktəbin direktoru, riyaziyyat müəllimi və şagirdlərlə görüş təşkil edilmişdir. Müsabiqəyə təqdim olunacaq layihə üzərində iş məqsədilə mütəmadi olaraq həm əyani, həm də onlayn formada şagirdlərlə görüşlər keçirilir.

Növbəti görüş 13 dekabr 2021-ci il tarixində İdarəetmə Sistemləri İnstitutunda baş tutmuşdur. Komandaya elmi rəhbərlik edən Fəhrad Paşayev müsabiqəyə təqdim olunacaq layihə üzərində işin gedişatı barədə şagirdlərlə müzakirələr aparmış, öz fikir və tövsiyələrini bildirmişdir.